Rossiyalik taniqli kino va teatr aktyori, rejissor, “Brigada”, “Jmurki”, “Ostrov” kabi serial va filmlarda bosh qahramon obrazini yaratgan Dmitriy Dyujev 3-fevral kuni Toshkentga keldi. Bu haqda, “O‘zbekkino” milliy agentligi matbuot xizmatiga asoslanib, jurnalist Feruz Muhammad ma’lum qildi.
Dyujev O‘zbekiston davlat san’at va madaniyat instituti talabasi Muxlisa Azizovaning ishchi nomi “U” (“Она”) bo‘lgan filmida suratga tushadi. Azizova O‘zbekistonda 2016-yil dekabrida o‘tkazilgan PROlogue – yosh kinoijodkorlar tomonidan suratga olingan qisqa metrajli filmlar festivalida sovrindor bo‘lgan edi.
Filmda, Dyujevdan tashqari, Ra’no Shodiyeva va Karim Mirhodiyev ham suratga tushishi kutilmoqda. Filmni suratga olish ishlari 4—5-fevral kunlariga rejalashtirilgan.
HD CINEMA kinokompaniyasi filmni suratga olish uchun “O‘zbekfilm” kinostudiyasi pavilyonida maxsus dekoratsiya barpo qilgan. Taniqli va yosh kinoijodkorlardan iborat ijodiy guruh shakllantirilgan.
“Asar bugungi kun kishilarining ma’naviy olami, hayotiy maqsadlari hamda muammolarini ilgari suradi. Voqea markazida sevimli ayolining vafotidek og‘ir fojiani boshdan kechirgan inson tarixi gavdalanadi. O‘tmish xotiralari, hayotidagi qalb jarohatlari uni so‘nggi imkon sari boshlaydi”, — deyiladi “O‘zbekkino” axborotida.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)