«Бригада»даги Космос — Дмитрий Дюжев ўзбекистонлик талабанинг фильмида суратга тушиш учун Тошкентга келди

Россиялик таниқли кино ва театр актёри, режиссёр, «Бригада», «Жмурки», «Остров» каби сериал ва фильмларда бош қаҳрамон образини яратган Дмитрий Дюжев 3 февраль куни Тошкентга келди. Бу ҳақда, «Ўзбеккино» миллий агентлиги матбуот хизматига асосланиб, журналист Феруз Муҳаммад маълум қилди.

Дюжев Ўзбекистон давлат санъат ва маданият институти талабаси Мухлиса Азизованинг ишчи номи «У» («Она») бўлган фильмида суратга тушади. Азизова Ўзбекистонда 2016 йил декабрида ўтказилган PROlogue – ёш киноижодкорлар томонидан суратга олинган қисқа метражли фильмлар фестивалида совриндор бўлган эди.

Фильмда, Дюжевдан ташқари, Раъно Шодиева ва Карим Мирҳодиев ҳам суратга тушиши кутилмоқда. Фильмни суратга олиш ишлари 4—5 февраль кунларига режалаштирилган.

HD CINEMA кинокомпанияси фильмни суратга олиш учун «Ўзбекфильм» киностудияси павилёнида махсус декорация барпо қилган. Таниқли ва ёш киноижодкорлардан иборат ижодий гуруҳ шакллантирилган.

«Асар бугунги кун кишиларининг маънавий олами, ҳаётий мақсадлари ҳамда муаммоларини илгари суради. Воқеа марказида севимли аёлининг вафотидек оғир фожиани бошдан кечирган инсон тарихи гавдаланади. Ўтмиш хотиралари, ҳаётидаги қалб жароҳатлари уни сўнгги имкон сари бошлайди», — дейилади «Ўзбеккино» ахборотида.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.