O‘zbekiston Respublikasi Qishloq va suv xo‘jaligi vazirligi hamda Markaziy Osiyo mintaqaviy ekologik markazi o‘rtasida ikki loyihani amalga oshirish bo‘yicha shartnomani imzolash marosimi bo‘lib o‘tdi. Bu haqda “Daryo”ga vazirlik axborot xizmati ma’lum qildi.
AQSh Xalqaro taraqqiyot agentligi (USAID) tomonidan moliyalashtirilayotgan “Markaziy Osiyoda suv, ta’lim va hamkorlik” loyihasining maqsadi kadrlar tayyorlash tizimini yaxshilash, suv xo‘jaligi xodimlarining malakasini oshirish, suv resurslarini boshqarishda havzaviy yondashuv imkoniyatini namoyish qilish hamda mintaqaviy akademik hamkorlikni kengaytirishdan iborat.
Yevropa Ittifoqi tomonidan moliyalashtirilayotgan “Markaziy Osiyoda suv hamkorligi” loyihasida mintaqaviy suv hamkorligini kengaytirish, mintaqaviy va xalqaro amaliyotni o‘rganish va namoyish etish, Markaziy Osiyoda ekologiya va barqaror rivojlanish masalalarida o‘zaro hamkorlikni kuchaytirish, suv resurslarini boshqarish masalalari bo‘yicha innovatsion usul va amaliyotni ilgari surish ko‘zda tutilgan.
Kelishuv Qishloq va suv xo‘jaligi vazirining o‘rinbosari Shavkat Xamrayev va Markaziy Osiyo mintaqaviy ekologik markazi ijrochi direktori Iskandar Abdullayev tomonidan imzolandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)