Shavkat Mirziyoyev: Xorazmda bir yil ichida onalar o‘limi 13,5 promilledan 20,4 promillegacha ko‘paygan

Hozirgi vaqtda Xorazm viloyati tibbiyot tizimiga aholining e’tirozi juda katta, dori-darmonning narx-navosidan odamlar norozi. Bu haqda O‘zbekiston Prezidenti Shavkat Mirziyoyev Urganchda bo‘lib o‘tgan Xorazm viloyati faollari bilan uchrashuv vaqtida aytib o‘tdi. Uchrashuvdan reportaj “O‘zbekiston” telekanali orqali namoyish etildi.

Shavkat Mirziyoyevning so‘zlariga ko‘ra, viloyatda katta niyatlar bilan tashkil etilgan 160 ta qishloq vrachlik punkti (QVP)ning 86 tasi achinarli holatda, ular mutlaqo ta’mirlanmagan.

QVPlarni eng uzoq qishloqlarda qoldiramiz. O‘sha joyda vrach uchun uy-joy qurib beramiz, QVPni 24 soat ishlaydigan qilib beramiz. U yerda tibbiyot mashinasi bo‘ladi, dorixonasi bo‘ladi. Xizmat uyi bilan birga, mashinasini ham beramiz, 20 yillik kredit bilan. Agar vrach QVPdagi ishdan ketsa, bu imtiyozlar ham yo‘q bo‘ladi. Ikkinchi bir yana eng katta narsa, eng katta topshiriq — QVPdagi shifokor chaqaloqlarning sog‘lom tug‘ilishi bo‘yicha patronaj qilsin, uyma-uy yursin.

Shavkat Mirziyoyev, O‘zbekiston Prezidenti

O‘zbekiston Prezidentining qayd etishicha, Xorazm viloyati tibbiyot tizimida malakali mutaxassislar yetishmaydi.

Natijada viloyatda aholining kasallanish darajasi bir yil ichida 6 foizga oshgan, onalar o‘limi 13,5 promilledan 20,4 promillega ko‘paygan. Viloyatdagi bunday salbiy holatlarni bartaraf etish, sog‘liqni saqlash tizimini zamonaviy talablar darajasida ko‘tarish uchun qabul qilingan dasturda jami 124 milliard so‘mlik tadbirlar amalga oshirilishi ko‘zda tutilgan. Jumladan, 5 yoshgacha bolalar, homilador ayollarga 17,6 milliard so‘mlik bepul vitamin-mineral komplekslari ajratiladi.

Shavkat Mirziyoyev, O‘zbekiston Prezidenti

Viloyatdagi tibbiy xizmat ko‘rsatish sifatini oshirish maqsadida 19 ta tez yordam stansiyalarining moddiy-texnik bazasi yanada yaxshilanadi va umumiy amaliyot shifokorlari uchun qishloq tibbiy punktlarida uy-joylar quriladi. Prezidentning ta’kidlashicha, 2017-yilning o‘zida 1200 ta tibbiyot mashinasini sotib olish bo‘yicha qaror qabul qilingan.

O‘zbekiston Prezidentining so‘zlariga ko‘ra, Xorazmda 2017-yil sentabriga qadar Urganchdagi kardiologiya dispanseri negizida Rossiyaning Bakulev nomidagi yurak-qon tomir xirurgiyasi markazi filiali, shuningdek, Rossiyaning Pavlov nomli 1-sonli Sankt-Peterburg davlat tibbiyot universiteti bilan Toshkent tibbiyot akademiyasi hamkorligida endokrinologiya, otoloringologiya, gematologiya, allergologiya, terapiya yo‘nalishlari bo‘yicha ko‘p tarmoqli klinika tashkil etiladi.

Tasavvur qilinglar, hozir qancha odam Rossiyaga borib, qanchadan-qancha pulini tashlab kelyapti. Bularning qanday ovoragarchiligi bor, ularni u yerda kim kutib oladi, davolanishdan so‘ng kim unga qaraydi? Bakulov nomidagi markaz filialini tashkil qilishga hamma sharoitlarni qilyapmiz va Xorazmda bu albatta tashkil etiladi. Nima uchun Rossiyadan taklif qilishga majburmiz? Imorat qurib berishimiz mumkin, uskuna olib kelishimiz mumkin, ammo kim operatsiya qiladi, kim o‘rgatadi, kim dars beradi? Shuning uchun Xorazmda shu yilning sentabrigacha, qanchalik qiyin bo‘lmasin, qanchalik og‘ir bo‘lmasin, bu muassasalarni tashkil qilamiz.

Shavkat Mirziyoyev, O‘zbekiston Prezidenti

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.