Xorazm viloyatining Gurlan tumanida yashovchi Munavvara Davlatova (ism-shariflar o‘zgartirilgan) bir necha yil muqaddam o‘zini “tabib”, deb e’lon qildi. Uning tabibligiga birovlar ishondi, birovlar bunga qo‘l siltab qo‘ya qoldi, deb yozadi “Inson va qonun” nashri.
Kunlarning birida “tabib” opa huzuriga M.Rahimova kelib, qizi Malika Ro‘zimatovani darddan forig‘ etib berishni so‘raydi. Davlatova taklifni bajonidil qabul qilib, Malikani uyida “davolash”ga kirishadi. “Tabib” bu jarayonda o‘z mijozini obdan o‘rganadi. Qarasa, Malikadan tuppa-tuzuk sherik chiqishi ham mumkin. Davlatova buni fahmlab, anchadan buyon diliga tugib yurgan firibgarlik maqsadlarini amalga oshirishga kirishadi.
Ularning tuzog‘iga dastavval Urganch tumanidagi “Asalchilik” mahallasida yashovchi Rajabboy Bobojonov tushadi. Uning o‘g‘li giyohvandlik vositalari bilan bog‘liq jinoyat sodir etib, ozodlikdan mahrum qilingandi. Ikkovlon firibgarlik yo‘li bilan R.Bobojonovning ishonchini suiiste’mol qilishga kirishadi va o‘g‘lini 800 AQSh dollari hamda 400 ming so‘m pul evaziga qamoqdan ozod qilishga va’da beradi. Rajabboy aka firibgarlarning so‘ziga laqqa tushib, aytilgan pulni ularga darhol qo‘shqo‘llab tutqazadi.
Gurlanlik R.Otajonov to‘ng‘ich farzandi avtohalokat natijasida vafot etganligi bois qattiq iztirobga tushib, og‘ir dardga yo‘liqadi va najot izlab, Munavvara “tabib”ning uyiga boradi. Davlatova mo‘maygina daromadning “hidi”ni sezib, Malika degan “advokat” tanishi borligi, undan zarur yordam olish mumkinligini aytadi. Malikaning nimalarga qodirligini bayon qila turib, balki sizning o‘g‘lingiz tirikdir, avtohalokatda boshqa kishi o‘lgandir, deya ishontirishga urinadi.
Og‘ir ruhiy holatdagi bemor Rajabboy aka bunday avrashga laqqa ishonadi. Ish silliqqina bitayotganidan ruhlangan Munavvara esa fursatni o‘tkazmay Malikaga telefon qilib, tezda yetib kelishini tayinlaydi. Malika Rajabboy akaga Urganch shahrida advokat bo‘lib ishlashini, barcha huquqni muhofaza qiluvchi idoralarda tanishlari borligini, ular ko‘magida o‘g‘lini topib bera olishini aytadi.
Shundan so‘ng “advokat” ayol tezda ishga kirishib, Rajabboy akani “o‘g‘lingiz tirik, u qamoqda saqlanayapti”, deya avraydi. Farzandining tirikligiga astoydil ishongan odam ulardan pulni ham, mol-mulkni ham ayamaydi. 2014-yil fevralidan 24-avgustiga qadar ayni kunlarda go‘yoki qamoqda saqlanayotgan o‘g‘lini ozod qilish uchun firibgarlarga 31 500 AQSh dollari hamda 4,1 million so‘mlik oziq-ovqat va kiyim-kechaklarni in’om qilib yuboradi.
Sudda M.Ro‘zimatova hamda M.Davlatovalarning aybi to‘la tasdiqlandi. Muqaddam jinoyat sodir etib, amnistiya akti tufayli muqarrar jazodan qutulib qolgan M.Ro‘zimatova bu gal javobgarlikka tortildi va 11 yil muddatga ozodlikdan mahrum qilindi. M.Davlatova ham tegishli jazoga tortildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)