Ukrainaning sobiq prezidenti Viktor Yanukovich hayotiga xavf borligi sabab, 27-yanvar kuni Ukraina poytaxti Kiyevda bo‘ladigan so‘roqqa bormaydi. Bu haqda uning advokati Vitaliy Serdyuk ma’lum qildi. “Korrespondent.net”ning yozishicha, aynan Serdyuk Ukraina Bosh prokuraturasi so‘rog‘ida Yanukovich nomidan qatnashadi.
Advokatning so‘zlariga ko‘ra, u Ukraina Bosh prokuraturasiga sobiq davlat rahbarining hayotiga Ukrainada tahdid borligi haqida yana bir marta ariza kiritadi. Serdyukning qayd etishicha, uning mijozi gumonlanilayotgani haqida bildirishnoma olmagan va tergovdan qochayotgani yo‘q.
18-yanvar kuni Ukraina nashrlari Viktor Yanukovichning 2014-yil 1-martda Rossiya prezidenti Vladimir Putinga yo‘llagan maktubi suratini e’lon qilgan edi. Unda Ukrainaning o‘sha vaqtdagi davlat rahbari Rossiya prezidentidan “qonuniylik, tinchlik, tartib, barqarorlikn qayta tiklash va Ukraina aholisi himoya qilish uchun” Ukraina hududiga qo‘shin kiritishni so‘ragan.
Xabarlarga ko‘ra, mazkur maktub Ukrainaning sobiq davlat rahbariga qarshi 2016-yil noyabrida qo‘zg‘atilgan davlatga xiyonat ishi materiallari orasida ham bor. 2016-yilning dekabrida Kiyev sudi Yanukovichni hibsga olish uchun sanksiya bergan edi.
Viktor Yanukovich 2010—2014-yillarda Ukrainaga prezidentlik qilgan. U mamlakatni 2014-yil fevralida — Kiyev va Ukrainaning boshqa shaharlarida boshlangan ommaviy norozilik namoyishlaridan so‘ng tark etgan. Namoyishlar yakuniga ko‘ra, mamlakatda hokimiyat almashgan.
Yanukovichga nisbatan Ukrainada bir necha jinoyat ishlari qo‘zg‘atilgan. Sobiq prezident qidiruvga berilgan, uning Ukrainadagi mulki hibsga olingan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)