Украинанинг собиқ президенти Виктор Янукович ҳаётига хавф борлиги сабаб, 27 январь куни Украина пойтахти Киевда бўладиган сўроққа бормайди. Бу ҳақда унинг адвокати Виталий Сердюк маълум қилди. «Корреспондент.net»нинг ёзишича, айнан Сердюк Украина Бош прокуратураси сўроғида Янукович номидан қатнашади.
Адвокатнинг сўзларига кўра, у Украина Бош прокуратурасига собиқ давлат раҳбарининг ҳаётига Украинада таҳдид борлиги ҳақида яна бир марта ариза киритади. Сердюкнинг қайд этишича, унинг мижози гумонланилаётгани ҳақида билдиришнома олмаган ва терговдан қочаётгани йўқ.
18 январь куни Украина нашрлари Виктор Януковичнинг 2014 йил 1 мартда Россия президенти Владимир Путинга йўллаган мактуби суратини эълон қилган эди. Унда Украинанинг ўша вақтдаги давлат раҳбари Россия президентидан «қонунийлик, тинчлик, тартиб, барқарорликн қайта тиклаш ва Украина аҳолиси ҳимоя қилиш учун» Украина ҳудудига қўшин киритишни сўраган.
Хабарларга кўра, мазкур мактуб Украинанинг собиқ давлат раҳбарига қарши 2016 йил ноябрида қўзғатилган давлатга хиёнат иши материаллари орасида ҳам бор. 2016 йилнинг декабрида Киев суди Януковични ҳибсга олиш учун санкция берган эди.
Виктор Янукович 2010—2014 йилларда Украинага президентлик қилган. У мамлакатни 2014 йил февралида — Киев ва Украинанинг бошқа шаҳарларида бошланган оммавий норозилик намойишларидан сўнг тарк этган. Намойишлар якунига кўра, мамлакатда ҳокимият алмашган.
Януковичга нисбатан Украинада бир неча жиноят ишлари қўзғатилган. Собиқ президент қидирувга берилган, унинг Украинадаги мулки ҳибсга олинган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)