Ўзбекистоннинг барча фуқаролари, шунингдек, Ўзбекистон фуқароси бўлмаган шахслар Тошкент шаҳри ва Тошкент вилоятидан хонадон ёки уй сотиб олиш имконига эга бўлиши мумкин. Бу «Ўзбекистон Республикасини янада ривожлантириш бўйича ҳаракатлар стратегияси тўғрисида»ги Ўзбекистон Президентининг фармони лойиҳасида кўзда тутилган.
Фармон лойиҳасида Ўзбекистон резидентларига Тошкент шаҳри ва вилоятидан қиймати энг кам ойлик иш ҳақининг 2 минг бараваридан кам бўлмаган, норезидентларга эса қиймати 100 минг доллардан кам бўлмаган янги қурилган кўчмас мулкни эркин сотиб олиш ва эгалик қилиш имконини берувчи қоидани жорий этиш таклиф қилинган.
Айни вақтда, Тошкент шаҳри ёки Тошкент вилоятидан янги қурилган кўчмас мулкни сотиб олаётгани учун резидентлар ва норезидентлар, кўчмас мулкнинг қийматидан келиб чиққан ҳолда, 5—10 фоиз миқдорда давлат божи тўлаши ҳам керак бўлади.
Фармон лойиҳасида қайд этилишича, мазкур ўзгаришнинг қабул қилиниши «фуқароларнинг хусусий мулк ҳуқуқини амалга ошириш кафолатларини мустаҳкамлашга, Тошкент шаҳри ва вилоятида уй-жой қуриш соҳасини жадал ривожланишига хизмат қилади».
Ҳозирги вақтда Тошкент шаҳри ва Тошкент вилоятидан кўчмас мулк сотиб олиш ва эгалик қилиш учун бевосита шу ҳудудлар пропискасига эга бўлиш лозим. Айни вақтда, Тошкент шаҳрида рўйхатдан ўтган фуқаролар Тошкент вилоятидан кўчмас мулк сотиб олиши ва эгалик қилиши мумкин, бироқ Тошкент вилоятида рўйхатдан ўтган фуқаролар пойтахт шаҳардан уй ололмайди.
Маълумот учун, «Ўзбекистон Республикасини янада ривожлантириш бўйича ҳаракатлар стратегияси тўғрисида»ги Ўзбекистон Президентининг Фармони лойиҳаси ўзгартирилиши, тўлдирилиши ёки рад этилиши мумкин.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)