AQShning qator shtatlariga yopirilgan kuchli dovul, tornado va suv toshqinlari oqibatida halok bo‘lganlar soni 20 nafarga yetdi. Bu haqda “TASS” xabar bermoqda.
So‘nggi ikki qurbondan biri Kaliforniyaning Mendosino okrugidan, ikkinchisi esa San-Diyego okrugidan topilgan. Yana uch kishi, jumladan, bir bolakay bedarak yo‘qolganlar ro‘yxatida turibdi.
Avvalroq tabiiy ofat natijasida AQShning Jorjiya shtatida 14 kishi, Missisipida esa to‘rt kishi halok bo‘lgani haqida xabar berilgan edi.
Jorjiya gubernatori Natan Dil tabiiy ofatdan ayniqsa ko‘p zarar ko‘rgan shtatning ayrim okruglarida favqulodda holat tartibini e’lon qilgan. Missisipining ayrim hududlarida ham shunday tartib o‘rnatilgan.
Tabiiy ofat kuchini, shuningdek, Texas, Alabama, Luiziana va Florida shtatlari ham o‘zida his qilib ko‘rgan, biroq bu shtatlardan qurbonlar haqida axborot kelib tushmagan; ba’zi hududlarda uy va binolar zarar ko‘rgani va vayron bo‘lgani haqida ma’lumotlar bor.
AQSh prezidenti Donald Tramp Jorjiya, Florida va Alabamaga federal yordam ko‘rsatishga va’da berdi. Uning so‘zlariga ko‘ra, bu shtatlar tabiiy ofat natijasida “jiddiy talofat” ko‘rgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)