Rossiyaning uzoq masofaga parvoz qiluvchi oltita Tu-22M3 bombardimonchi samolyotlari IShID marralariga aviazarbalar berdi. Bu haqda “TASS” xabar bermoqda.
Iroq va Eron ustidan uchib o‘tgan samolyotlar IShIDning Dayr-az-Zor (Suriya) aholi yashash punktida harakatda bo‘lgan jangarilari boshqaruv punkti, qurol va o‘q-dori omborxonalariga zarba berdi.
Rossiya Mudofaa vazirligidan ma’lum qilishlaricha, belgilangan nishonlarning barchasi yo‘q qilingani obyektiv nazorat vositalari orqali tasdiqlangan.
Avvalroq Rossiya Qurolli kuchlari Bosh shtabi Tezkor boshqarmasi boshlig‘i, general-leytenant Sergey Rudskiy Dayr-az-Zorda murakkab vaziyat yuzaga kelgani, son jihatdan ko‘pchilik bo‘lgan jangarilar shaharni muttasil qamal qilayotgani, agar shahar taslim bo‘lsa, uning aholisi genotsid xavfi ostida qolishi mumkinligini ma’lum qilgan edi.
“TASS”ning yozishicha, Rossiyaning bombardimonchi samolyotlari 21-yanvar kuni ham Dayr-az-Zorda shu kabi operatsiyani muvaffaqiyatli o‘tkazgan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)