АҚШ президенти Дональд Трамп унинг сайлангани муносабати билан Вашингтон, Нью-Йорк, Лос-Анжелес ва жаҳоннинг 600 дан ортиқ шаҳарларида бўлиб ўтган норозилик намойишларига муносабат билдирди.
Трампнинг сўзларига кўра, у норозилик намойишлари бўлаётганини кўрди, бироқ, унинг қайд этишича, сайловлар ўтиб бўлган. «Нима учун бу одамлар овоз бермади?», — дея таъкидлади у.
Трамп «Вашингтон томон аёллар марши»нинг минглаб иштирокчилари сайловда овоз бермади деган хулосага қандай қилиб келганига аниқлик киритилмаган.
Асосий норозилик намойиши бўлиб ўтган Колумбия округидаги Вашингтон шаҳрида Трамп 4 фоизга яқин овоз олган; Трамп унга овоз берган сайловчилар сони бўйича рақиби Ҳиллари Клинтонга тахминан 3 миллион овозга ютқазган, бироқ танловчилар ҳайъатининг овозлари бўйича сайловда ғолиб чиқди.
21 январь куни, Америка президенти инаугурациясининг эртасига, АҚШ ва жаҳоннинг кўплаб йирик шаҳарларида умумий «Вашингтон томон аёллар марши» номи остида Дональд Трампнинг сайланганига бағишланган норозилик намойишлари бўлиб ўтди. Намойишларнинг асосий мавзуси аёллар ҳуқуқи учун кураш ва Трампнинг хотин-қизлар ҳақидаги қўпол фикрларига салбий муносабат билдиришдан иборат бўлди.
Акция ташкилотчиларининг сўзларига кўра, норозилик намойишларида бутун дунё бўйлаб 5 миллионга яқин одам қатнашган. Вашингтон маъмурияти тарқатган ахборотга кўра, 21 январь куни шаҳар транспорти бир кун аввалги — инаугурация кунидагига нисбатан кўпроқ банд бўлган, бироқ мазкур тадбирларга ташрифлар сони бўйича расмий ахборот ҳозирча йўқ.
Аввалроқ Трамп ОАВни ўз инаугурацияси ташрифчилари сонини камайтириб кўрсатишда айблаб чиққан эди. У 22 январь куни Twitter’даги саҳифаси орқали унинг инаугурацияси телеаудиторияси Барак Обаманинг 2013 йилги қасамёди томошабинлари сонидан ошиб кетганини билдирган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)