O‘zbekiston Respublikasi Bosh prokurori Ixtiyor Abdullayev rossiyalik hamkasbi Yuriy Chayka bilan Moskvada muzokaralar o‘tkazdi. Bu haqda Rossiya Bosh prokuraturasi matbuot xizmati ma’lum qildi, deya xabar beradi UzDaily.
Yuriy Chayka O‘zbekiston va Rossiya prokuraturalarining hamkorligi yuqori darajadagi ishonch hamda o‘zaro qo‘llab-quvvatlashga asoslangani, bu hamkorlik BMT, Shanxay hamkorlik tashkiloti va Xalqaro prokurorlar assotsiatsiyasi doirasidagi tadbirlarda ham o‘z aksini topayotganini qayd etdi.
O‘zbekiston va Rossiya prokuraturalari jinoiy sud jarayoni, odam savdosi, huquqiy bilimlarni tarqatish borasida doimiy asosda tajriba almashib turishi ta’kidlandi.
Muzokaralar chog‘ida O‘zbekiston va Rossiya prokuraturalarining o‘zaro hamkorligi istiqbollari, O‘zbekiston Respublikasi Bosh prokuraturasining MDH bosh prokurorlari muvofiqlashtiruvchi kengashidagi ishtiroki muhokama qilindi.
Tadbir davomida kadrlar tayyorlash masalasida Rossiya Federatsiyasi Bosh prokuraturasi akademiyasi va O‘zbekiston Respublikasi Bosh prokuraturasi oliy kurslari o‘rtasida o‘zaro anglashinuv va hamkorlik to‘g‘risidagi memorandum imzolandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)