Xitoy Super ligasida endi faqatgina uch nafar xorijlik futbolchi maydonda harakat qilishi mumkin. Mamlakat futbol assotsiatsiyasi buni rasman ma’lum qildi, deb yozdi “Chempionat”.
Yangi qoidaga ko‘ra, o‘yin qaydnomasidan besh nafar legioner futbolchi o‘rin egallashi uchun imkon berildi. Shularning faqatgina uch nafari bir vaqtning o‘zida maydonda to‘p sura oladi. Bundan tashqari, har bir klub uchrashuv qaydnomasiga ikki nafar 23 yoshgacha bo‘lgan xitoylik futbolchini kiritishi shart. Ulardan biri boshlang‘ich tarkibda to‘p surishi kafolatlangan.
Qayd etish kerak, Xitoy chempionatida yangi mavsum 4-mart sanasida start oladi. Avvalroq Xitoy chempionatida bir nafar osiyolik va to‘rt nafar xorijlik futbolchini qaydnomaga kiritish mumkin bo‘lib, maydonda osiyolik va yana uch nafar boshqa legioner harakat qila olardi. Yangi qaror esa osiyolik futbolchilar imkoniyatini pasaytirib yuborishi mumkin.
Masalan, “Shanxay SIPG” bosh murabbiyi Andre Villash-Boash maydonga Odil Ahmedovni tushirishi uchun Elkesen, Oskar, Xalk va Rikardu Karvalyu kabi futbolchilardan istalgan ikkitasini zaxirada qoldirishga majbur bo‘ladi.
Portugaliyalik mutaxassis oldingi chiziqda Oskar, Xalk va Elkesen triosini o‘ynatishni niyat qilayotgandi. Elkesen o‘zining to‘rtta mavsumini Xitoy Super ligasida o‘tkazgan bo‘lib, 98 ta uchrashuvda 70 ta gol urishga muvaffaq bo‘lgan. Mana shunday statistikali futbolchining zaxirada qolib ketishini tasavvur qilish qiyin. Oskar va Xalk kabi qimmat narxga sotib olingan futbolchilar ham zaxira changini artish uchun Shanxayga tashrif buyurmagan.
Anzur Ismoilov to‘p suradigan “Chanchun Yatai” safida yana 4 nafar xorijlik bor: Marselo Moreno (Boliviya), Bruno (Braziliya), Mislav Orsich va Darko Matich (Xorvatiya). Bu futbolchilarning hech biri himoya chizig‘ida to‘p surmaydi. Biroq yangi qoidaga ko‘ra, jamoa bosh murabbiyi bir vaqtning o‘zida ularning faqatgina 3 nafaridan foydalana oladi.
O‘zbekiston milliy terma jamoasining yana bir asosiy himoyachisi Yegor Krimets “Beytszin Goan” safida braziliyalik Renato va Ralf, shuningdek, turkiyalik Burak Yilmaz bilan raqobatda bo‘ladi. Ulardan biri zaxirada qolishi kerak.
Izoh (0)