Хитой Супер лигасида энди фақатгина уч нафар хорижлик футболчи майдонда ҳаракат қилиши мумкин. Мамлакат футбол ассоциацияси буни расман маълум қилди, деб ёзди «Чемпионат».
Янги қоидага кўра, ўйин қайдномасидан беш нафар легионер футболчи ўрин эгаллаши учун имкон берилди. Шуларнинг фақатгина уч нафари бир вақтнинг ўзида майдонда тўп сура олади. Бундан ташқари, ҳар бир клуб учрашув қайдномасига икки нафар 23 ёшгача бўлган хитойлик футболчини киритиши шарт. Улардан бири бошланғич таркибда тўп суриши кафолатланган.
Қайд этиш керак, Хитой чемпионатида янги мавсум 4 март санасида старт олади. Аввалроқ Хитой чемпионатида бир нафар осиёлик ва тўрт нафар хорижлик футболчини қайдномага киритиш мумкин бўлиб, майдонда осиёлик ва яна уч нафар бошқа легионер ҳаракат қила оларди. Янги қарор эса осиёлик футболчилар имкониятини пасайтириб юбориши мумкин.
Масалан, «Шанхай СИПГ» бош мураббийи Андре Виллаш-Боаш майдонга Одил Аҳмедовни тушириши учун Элкесен, Оскар, Халк ва Рикарду Карвалю каби футболчилардан исталган иккитасини захирада қолдиришга мажбур бўлади.
Португалиялик мутахассис олдинги чизиқда Оскар, Халк ва Элкесен триосини ўйнатишни ният қилаётганди. Элкесен ўзининг тўртта мавсумини Хитой Супер лигасида ўтказган бўлиб, 98 та учрашувда 70 та гол уришга муваффақ бўлган. Мана шундай статистикали футболчининг захирада қолиб кетишини тасаввур қилиш қийин. Оскар ва Халк каби қиммат нархга сотиб олинган футболчилар ҳам захира чангини артиш учун Шанхайга ташриф буюрмаган.
Анзур Исмоилов тўп сурадиган «Чанчун Ятаи» сафида яна 4 нафар хорижлик бор: Марсело Морено (Боливия), Бруно (Бразилия), Мислав Орсич ва Дарко Матич (Хорватия). Бу футболчиларнинг ҳеч бири ҳимоя чизиғида тўп сурмайди. Бироқ янги қоидага кўра, жамоа бош мураббийи бир вақтнинг ўзида уларнинг фақатгина 3 нафаридан фойдалана олади.
Ўзбекистон миллий терма жамоасининг яна бир асосий ҳимоячиси Егор Кримец «Бейцзин Гоан» сафида бразилиялик Ренато ва Ральф, шунингдек, туркиялик Бурак Йилмаз билан рақобатда бўлади. Улардан бири захирада қолиши керак.
Изоҳ (0)