Futbol bo‘yicha Xitoy terma jamoasi a’zosi Chjan Chendun “Beyjing Guoan”dan “Xebey Forchun”ga 20,4 million yevro evaziga ko‘chib o‘tdi. “Championat.asia”ning yozishicha, bu transfer 27 yoshli Chendunni futbol tarixidagi eng qimmat xitoylik o‘yinchiga aylantirdi.
Transfermarkt China ma’lumotlariga ko‘ra, Chjan Chendunning transfer narxi 475 ming yevroga teng edi. Biroq “Xebey Forchun” futbolchi uchun 43 baravar ko‘proq pul to‘lashga rozi bo‘lgan.
Bu boradagi avvalgi rekord Szin Yanyanga tegishli bo‘lib, u ham o‘tgan mavsum “Guanchjou Fuli”dan o‘sha vaqtdagi rekord narx – 10,8 million yevro evaziga “Xebey Forchun”ga o‘tgan edi.
Futbol yulduzlari uchun jannatmakon o‘lkaga aylanib ulgurgan Xitoyda “Xebey Forchun” dovruqli legionerlarga boy klublardan biri sanaladi.
Jamoaga o‘z vaqtida “Real Madrid” va “Manchester Siti” bosh murabbiyi sifatida ishlagan chililik mutaxassis – Manuel Pellegrini ustozlik qiladi. Jamoa safida esa Gael Kakuta, Esekyel Lavessi, Stefan Mbia, Jervinyu kabi mashhur futbolchilar bor.
Avvalroq “Xebey Forchun” Lionel Messiga bir necha yillik shartnoma uchun soliqlardan tashqari 100 million yevro maosh to‘lashga tayyorligi, kolumbiyalik hujumchi Xames Rodriges uchun “Real Madrid”ga 110 million yevro to‘lashi mumkinligi haqida xabarlar paydo bo‘lgan edi.
Biroq keyinroq klub rahbariyati mazkur xabarlarni rasman rad etib chiqib, “mish-mishlarni to‘qib chiqarishda klub nomidan foydalanishni bas qilishni so‘ragan” edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)