O‘zbekiston Respublikasi Prezidenti Shavkat Mirziyoyev mamlakatni 2016-yilda ijtimoiy-iqtisodiy rivojlantirishning asosiy yakunlari va 2017-yilga mo‘ljallangan iqtisodiy dasturning eng muhim ustuvor yo‘nalishlariga bag‘ishlangan Vazirlar Mahkamasining kengaytirilgan majlisida ma’ruza bilan chiqish qildi. Ma’ruza matnini O‘zA e’lon qildi.
Prezident ijtimoiy sohadagi, xususan, sog‘liqni saqlash borasidagi muammolarga alohida to‘xtalib o‘tdi.
“Tibbiyot xodimlari o‘rtasidagi salbiy holatlarga qachon barham beriladi? Bu borada faqatgina o‘tgan yilning o‘zida 174 ta jinoyat ishi qo‘zg‘atilgan. Sog‘liqni saqlash xodimlari bilan yaqinda bo‘lib o‘tgan uchrashuvda tug‘ruqxonalardagi ta’magirlik bilan bog‘liq salbiy holatlar to‘g‘risida sizga va tizim rahbarlariga alohida aytgan edim”, — dedi Shavkat Mirziyoyev ushbu sohalardagi muammolarni birma-bir sanar ekan.
Bundan tashqari, Prezident sog‘liqni saqlash tizimining birlamchi bo‘g‘ini, eng avvalo, qishloq vrachlik punktlarini isloh qilish samaradorligi ta’minlanmagani; diagnostika darajasi pastligi va vrachlarning malakasi yetarli emasligi natijasida yiliga 30 mingdan ziyod yurtdoshimiz davolanish uchun xorijiy mamlakatlarga borishga va oila byudjetidan katta mablag‘ sarflashga majbur bo‘layotgani; tez tibbiy yordam tuzilmalari aksariyat holatlarda bemorlarga haqiqiy tez yordam ko‘rsata olmasligi kabi masalalarni ham tilga oldi.
Izoh (0)