O‘zbekiston Prezidenti Shavkat Mirziyoyev mamlakatni 2016-yilda ijtimoiy-iqtisodiy rivojlantirishning asosiy yakunlari va 2017-yilga mo‘ljallangan iqtisodiy dasturning eng muhim ustuvor yo‘nalishlariga bag‘ishlangan Vazirlar Mahkamasining kengaytirilgan majlisida hukumat faoliyatini tanqid ostiga oldi, deb yozadi “Gazeta.uz”.
Bosh vazir o‘rinbosari, Eksport salohiyati va mashinasozlikni, avtomobil va elektrotexnika sanoatini rivojlantirish, mahsulotlarni standartlashtirish masalalari bo‘yicha kompleks rahbari, “O‘zavtosanoat” kompaniyasi boshqaruvi raisi Ulug‘bek Ro‘ziqulov hayfsan oldi.
Hayfsan, shuningdek, bosh vazir o‘rinbosari, Geologiya, yoqilg‘i-energetika kompleksi, kimyo, neft-kimyo va metallurgiya sanoati masalalari bo‘yicha kompleks rahbari G‘ulomjon Ibragimovga ham e’lon qilindi.
Ishdagi kamchiliklar tufayli, 1 trillion so‘m hajmida qarzdorligi bo‘lgan “O‘zneftmahsulot” kompaniyasi rahbari Baxtiyor Sultonov iste’foga chiqarildi. Bundan tashqari, davlat rahbari so‘zlariga ko‘ra, faoliyati “davr talablariga mutlaqo javob bermaydigan” “O‘zeltexsanoat” kompaniyasi rahbari Erkin Iminov ham o‘z lavozimidan ajraldi.
Prezident, shuningdek, “O‘zkimyosanoat” raisi Normat Ibragimovni lavozimidan ozod etishni taklif qildi. Boshqa bir qator mansabdorlarning ham faoliyati jiddiy tanqid ostiga olindi.
“Hammamizga bir haqiqat ravshan bo‘lishi lozim: biz mavjud rivojlanish sur’atlari bilan o‘z oldimizga qo‘ygan yuksak maqsadlarga erisha olmaymiz. Bugun zamon o‘zgarmoqda, uning talabi, oldimizga qo‘yayotgan vazifalari tobora ortib bormoqda. Mana shunday murakkab sharoitda “Sen – menga tegma, men – senga tegmayman” degan kayfiyat bilan ishlashning vaqti o‘tdi. Biz “vaziyat yomon, vaziyat og‘ir” deb bahona qidirishga o‘rganib qolganmiz. Lekin shu vaziyatni kim o‘zgartiradi, kim izga soladi, degan savolni, keling, o‘zimizga beraylik. Vaziyatni o‘zimiz, o‘z aql-zakovatimiz, mehnatimiz bilan o‘zgartirmasak, hech kim chetdan kelib bu ishni biz uchun qilib bermaydi”, — dedi davlat rahbari.
Izoh (0)