AQShda parvozlar xavfsizligini ta’minlash uchun 70 ming qushni yo‘q qilishdi

So‘nggi yetti yil ichida Nyuark va La-Guardiya aeroportlarida parvozlar xavfsizligini ta’minlash uchun Nyu-Yorkda 70 mingdan ortiq qushlar o‘ldirildi, deb yozadi “RIA Novosti” The Guardian’ga tayanib.

Jurnalistlar ishontirishicha, shahar hukumati 2009-yilda Gudzon daryosiga A320 samolyoti avariyali qo‘nishni amalga oshirgach, parrandalardan qutulishga qaror qilgan. O‘shanda ekspertlar samolyotning ikkita dvigateli ishlamay qolishiga laynerning Kanada kazarkalari (yovvoyi g‘oz turi) galasi bilan to‘qnashib ketgani sabab bo‘lganini aytgan edi.

“Ammo qushlarning yo‘q qilinishi vaziyatni yaxshi tomonga o‘zgartirgan-o‘zgartirmaganligi noaniq”, — deyiladi maqolada. Mualliflar qanotlilar ishtirokidagi hodisalar soni ikki karra oshganidan darak beruvchi aeroportlar ichki statistikasiga asoslandi. Unga ko‘ra, 2004—2009-yillarda qushlarning avialaynerlar bilan to‘qnashishiga oid 158 ta holat, 2007-yildan hozirgacha esa 299 ta holat qayd etilgan.