O‘zbekiston milliy terma jamoasi bosh murabbiyi Samvel Babayan “Lokomotiv”ning 9 nafar futbolchisini yanvar oyidagi yig‘inga taklif qildi. Bu haqda “temiryo‘lchilar” matbuot xizmati xabar berdi. Ular orasida hujumchi Temurxo‘ja Abduxoliqov ham bor.
Avvalroq Samvel Babayan Temurxo‘ja Abduxoliqov terma jamoa prinsiplariga to‘g‘ri kelmasligi haqida aytib o‘tgandi. Shu fikrdan keyin Abduxoliqov 2016-yilgi mavsumni O‘zbekiston Oliy ligasining to‘purari sifatida yakunladi va “Lokomotiv” bilan yana bir yillik kelishuvga erishdi.
Samvel Babayan, shuningdek, darvozabon Ignatiy Nesterov, himoyachilar Bobur Yo‘ldoshev, Islom To‘xtaxo‘jayev, Shuhrat Muhammadiyev, yarim himoyachilar Sardor Mirzayev, Server Jeparov, Sanjar Shoahmedov va hujumchi Marat Bikmayevni ham tarkibga jalb qilgan.
Ma’lumot uchun, 21—24-yanvar kunlari O‘zbekiston terma jamoasi Amirlik yig‘inida ishtirok etadi. Uning doirasida 22-yanvar kuni Daniyaning 23 yoshgacha bo‘lgan futbolchilariga qarshi, shuningdek, Gruziya termasiga qarshi o‘rtoqlik o‘yinlari bo‘lib o‘tadi. Mazkur bellashuvlar FIFA kunlaridan tashqarida o‘tayotgani uchun Samvel Babayan BAA yig‘iniga legionerlarni taklif qila olmaydi.
“Lokomotiv” klubi ayni vaqtda Dubayda bo‘lib turibdi. Yig‘in aynan 21-yanvar kuni o‘z yakuniga yetadi va nomlari sanab o‘tilgan futbolchilar Dubaydan Toshkentga qaytmay, terma jamoa yig‘iniga qo‘shiladi.
O‘zbekiston milliy terma jamoasining Amirliklarga boradigan to‘liq tarkibi hozircha ma’lum qilinmagan.
Izoh (0)