Bugun — 9-yanvar kuni Toshkent vaqti bilan 22:30 da boshlanadigan FIFAning yillik taqdirlash marosimida “Barselona”ning yetakchi futbolchilari ishtirok etmaydi. Bu haqda “Sports.ru” klub matbuot xizmatiga tayanib, axborot berdi.
“Barselona” delegatsiyasiga klub prezidenti Jozep Bartomeu rahbarlik qiladi. Biroq unga Lionel Messi, Luis Suares, Andres Inyesta va Herard Pike hamrohlik qilolmaydi. Bunga sabab sifatida “Barselona”ning 11-yanvar kuni “Atletik”ka qarshi bo‘lib o‘tadigan Ispaniya kubogidagi o‘yini ko‘rsatilgan. Jamoa bellashuvga jiddiy tayyorgarlik ko‘rishi kerak.
Messi 2016-yilning eng yaxshi futbolchisi bo‘lish va shu yo‘l orqali The Best sovrinining birinchi egasiga aylanish uchun da’vogarlik qilayotgandi. Qolgan uch futbolchi esa yilning ramziy terma jamoasidan joy olgan. “Barselona” rahbariyati FIFAga taklif uchun minnatdorchilik bildirgan va vaziyatni tushuntirgan.
Ma’lumot uchun, Ispaniya kubogi chorak finaliga yo‘l olish uchun harakat qilayotgan “Barselona” Bilbaoda kechgan “Atletik”ka qarshi ilk uchrashuvda 1:2 hisobida yengilgandi.
Izoh (0)