Бугун — 9 январь куни Тошкент вақти билан 22:30 да бошланадиган ФИФАнинг йиллик тақдирлаш маросимида «Барселона»нинг етакчи футболчилари иштирок этмайди. Бу ҳақда «Sports.ru» клуб матбуот хизматига таяниб, ахборот берди.
«Барселона» делегациясига клуб президенти Жозеп Бартомеу раҳбарлик қилади. Бироқ унга Лионель Месси, Луис Суарес, Андрес Иньеста ва Ҳерард Пике ҳамроҳлик қилолмайди. Бунга сабаб сифатида «Барселона»нинг 11 январь куни «Атлетик»ка қарши бўлиб ўтадиган Испания кубогидаги ўйини кўрсатилган. Жамоа беллашувга жиддий тайёргарлик кўриши керак.
Месси 2016 йилнинг энг яхши футболчиси бўлиш ва шу йўл орқали The Best совринининг биринчи эгасига айланиш учун даъвогарлик қилаётганди. Қолган уч футболчи эса йилнинг рамзий терма жамоасидан жой олган. «Барселона» раҳбарияти ФИФАга таклиф учун миннатдорчилик билдирган ва вазиятни тушунтирган.
Маълумот учун, Испания кубоги чорак финалига йўл олиш учун ҳаракат қилаётган «Барселона» Бильбаода кечган «Атлетик»ка қарши илк учрашувда 1:2 ҳисобида енгилганди.
Изоҳ (0)