O‘zbekiston Milliy olimpiya qo‘mitasi prezidenti etib saylangan Alisher Sultonovga tashkilotni boshqarish ishlarida 4 nafar vitse-prezident yordam beradi: Valeriy Tyan, Salim Abduvaliyev, Farhod Turdiyev va Umid Ahmadjonov. Bu haqda MOQ matbuot xizmati ma’lumot berdi.
Valeriy Tyan, Salim Abduvaliyev va Farhod Turdiyev bunga qadar MOQ prezidenti vazifasida faoliyat olib borgan Mirabror Usmonov davrida ham vitse-prezident lavozimida ishlagan. Endi ular safiga Umid Ahmadjonov ham qo‘shildi.
Avvalgi 9 nafar vitse-prezident orasidan Malik Boboyev, Aleksandr Farmonov, Lyudmila Polivanova, Jasur Akramov va Ochilboy Ramatov nomzodlari bu safar ko‘rsatilmagan. Qayd etish kerak, Mirabror Usmonov MOQ prezidenti sifatida faoliyat olib borganida tashkilotning endigi prezidenti Alisher Sultonov ham vitse-prezidentlar qatoriga kiritilgandi.
Ma’lumot uchun, MOQ boshqaruvida yordam beradigan vitse-prezidentlardan Valeriy Tyan “O‘zbekiston havo yo‘llari” MAK bosh direktori hisoblanadi. Salim Abduvaliyev esa O‘zbekiston sport kurashlari assotsiatsiyasi raisi sifatida faoliyat olib boradi. Yangi qo‘shilgan Umid Ahmadjonov Milliy paralimpiya assotsiatsiyasi raisining o‘rinbosari hisoblanadi.
Tashkilot bosh kotibi Oybek Qosimov o‘z lavozimiga qayta saylandi va faoliyatini davom ettiradigan bo‘ldi.
Izoh (0)