Suriyaga parvoz vaqtida aviahalokatga uchragan Tu-154 samolyoti qulagan hududda omon qolganlar ko‘rinmayapti. Bu haqda, Rossiya Mudofaa vazirligiga asoslanib, “RBK” xabar bermoqda.
“Tu-154 samolyoti aviahalokatga uchragan hudud belgilandi. Omon qolganlar kuzatilmadi”, — deyiladi vazirlik axborotida.
Avvalroq vazirlik qutqaruvchilar to‘rt nafar qurbonni aniqlangani va ularning jasadlarini suvdan olib chiqqani haqida axborot bergan edi. Qulagan samolyot bortida jami 92 kishi bo‘lgan.
Rossiya Mudofaa vazirligining Tu-154 samolyoti 25-dekabr tongida Sochida qayta yonilg‘i olganidan so‘ng, Qora dengizga quladi. Samolyot Moskva viloyatidagi Chkalovskiy aerodromidan Suriyaga uchayotgan edi.Yo‘lovchilarning aksariyati Aleksandrov nomidagi ashula va raqs ansambli a’zolari bo‘lgan. Bortda, shuningdek, Rossiya “Birinchi kanali”, “NTV” va “Zvezda” telekanallarining tasvirga olish guruhlari ham bo‘lgan.
Rossiya Mudofaa vazirligidan ma’lum qilishlaricha, samolyotda “Adolatli yordam” jamg‘armasi ijrochi direktori Yelizaveta Glinka (Doktor Liza) ham bo‘lgan.
Aviahalokat munosabati bilan Rossiya prezidenti Vladimir Putin qurbonlarning qarindoshlari va yaqinlariga hamdardlik bildirdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)