Xonanda Munisa Rizayeva Instagram’dagi sahifasida hayot haqidagi faylasufona fikrlari bilan tez-tez o‘rtoqlashib turadi. Xususan, kuni kecha u “Sevgi nima?”, degan savolga qanday javob berishini ma’lum qildi.
“Sevgi bu — yaqin insoningizning birgina tabassumi qalbingizni cheksiz quvonchga to‘ldirishi, u uzoqlarda bo‘lgan vaqt qalbingiz tubini kemtiklik egallashi, xayollaringiz doimo u bilan band bo‘lishi, uning nafas olishi sizni baxtga to‘ldirishi; kulgingiz, shodligingiz sababchisi bo‘lgan inson sizning chin sevgingizdir”, — deb yozdi xonanda.
Ko‘p o‘tmay, xonanda qaysi tuyg‘udan qo‘rqishi, “insonni aslida nima o‘ldirishi” haqidagi fikrlarini yozgan.
“Mendan doim: ‘Hayotda qaysi tuyg‘udan qo‘rqasan?’, deb so‘radilar. Men har gal sukut saqladim. Mendan jahllari chiqdi, e’tiborsizlikda ayblab, meni tark etdilar. Afsus, bilmadilar-ki, men hayotda eng ko‘p sukunat degan tuyg‘udan qo‘rqardim. Chunki insonni sukunatdan-da oson taslim etuvchi, yakson qiluvchi tuyg‘u yo‘q. Aslida insonni nafrat, haqorat emas, balki sukunat o‘ldiradi...”, — deb yozgan Munisa, o‘z xabarini: “Savollarga javob ololmaslikdan-da og‘irroq his bo‘lmasa kerak”, — degan gap bilan tugatgan.
Mazkur xabar ostida uning muxlislaridan biri: “Nega muxlislaringizga javob bermaysiz? Axir sizni tanitgan ham, boqadigan ham muxlislaringiz-ku! Ularsiz hech kimsiz, bu haqiqat”, — deb komment qoldirgan. Munisa Rizayeva bunga darhol javob qaytargan.
“Ularsiz men hech kim? Nimasi bu? Demak, men ashula aytmasam, hayotda ham hech kimmanmi? To‘g‘rirog‘i, siz menga bunday gaplarni yozish uchun hech kimsiz! Men doim muxlislarimga imkon qadar javob beraman!”, — deb yozgan xonanda.
Bunga javoban, muhokamaga sababchi bo‘lgan foydalanuvchi: “Xafa bo‘lmang. Agar sizlarga mana shunday tegadigan qilib gapirmasa, javob yozmaysizlar. Qo‘shiq aytmasangiz, hech kim emassiz, demadim. Hamma xonandalar O‘zbekistonda sizlarni taniydigan, hurmat qiladigan millionlab odamlarning ishonchini oqlashini xohlayman. Lekin to‘g‘ri, muxlislarsiz siz ham oddiy ayolsiz”, — deb yana fikr bildirgan.
Munisa Rizayeva muxlisining bu fikrlariga javob tarzida shunday degan: “Ishonchni kim oqlayapti-yu, kim oqlamayapti — buni siz ham, men ham bilmaymiz, Allohdan boshqa hech kim bilmaydi. Shuning uchun, yozishdan avval kamida 10 marta o‘ylab ko‘ring!”.
Mazkur muhokamada aksariyat muxlislar Munisa Rizayevani qo‘llab-quvvatlagan. Xususan, muhokamaga sabab bo‘lgan foydalanuvchiga Munisa Rizayevaning Instagram’dagi boshqa postlariga ham e’tibor qaratish tavsiya qilingan, xonanda avvalgi xabarlarida ham muxlislarning murojaatlariga javob qaytargani eslatib o‘tilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)