Хонанда Муниса Ризаева Instagram’даги саҳифасида ҳаёт ҳақидаги файласуфона фикрлари билан тез-тез ўртоқлашиб туради. Хусусан, куни кеча у «Севги нима?», деган саволга қандай жавоб беришини маълум қилди.
«Севги бу — яқин инсонингизнинг биргина табассуми қалбингизни чексиз қувончга тўлдириши, у узоқларда бўлган вақт қалбингиз тубини кемтиклик эгаллаши, хаёлларингиз доимо у билан банд бўлиши, унинг нафас олиши сизни бахтга тўлдириши; кулгингиз, шодлигингиз сабабчиси бўлган инсон сизнинг чин севгингиздир», — деб ёзди хонанда.
Кўп ўтмай, хонанда қайси туйғудан қўрқиши, «инсонни аслида нима ўлдириши» ҳақидаги фикрларини ёзган.
«Мендан доим: ‘Ҳаётда қайси туйғудан қўрқасан?’, деб сўрадилар. Мен ҳар гал сукут сақладим. Мендан жаҳллари чиқди, эътиборсизликда айблаб, мени тарк этдилар. Афсус, билмадилар-ки, мен ҳаётда энг кўп сукунат деган туйғудан қўрқардим. Чунки инсонни сукунатдан-да осон таслим этувчи, яксон қилувчи туйғу йўқ. Аслида инсонни нафрат, ҳақорат эмас, балки сукунат ўлдиради...», — деб ёзган Муниса, ўз хабарини: «Саволларга жавоб ололмасликдан-да оғирроқ ҳис бўлмаса керак», — деган гап билан тугатган.
Мазкур хабар остида унинг мухлисларидан бири: «Нега мухлисларингизга жавоб бермайсиз? Ахир сизни танитган ҳам, боқадиган ҳам мухлисларингиз-ку! Уларсиз ҳеч кимсиз, бу ҳақиқат», — деб коммент қолдирган. Муниса Ризаева бунга дарҳол жавоб қайтарган.
«Уларсиз мен ҳеч ким? Нимаси бу? Демак, мен ашула айтмасам, ҳаётда ҳам ҳеч кимманми? Тўғрироғи, сиз менга бундай гапларни ёзиш учун ҳеч кимсиз! Мен доим мухлисларимга имкон қадар жавоб бераман!», — деб ёзган хонанда.
Бунга жавобан, муҳокамага сабабчи бўлган фойдаланувчи: «Хафа бўлманг. Агар сизларга мана шундай тегадиган қилиб гапирмаса, жавоб ёзмайсизлар. Қўшиқ айтмасангиз, ҳеч ким эмассиз, демадим. Ҳамма хонандалар Ўзбекистонда сизларни танийдиган, ҳурмат қиладиган миллионлаб одамларнинг ишончини оқлашини хоҳлайман. Лекин тўғри, мухлисларсиз сиз ҳам оддий аёлсиз», — деб яна фикр билдирган.
Муниса Ризаева мухлисининг бу фикрларига жавоб тарзида шундай деган: «Ишончни ким оқлаяпти-ю, ким оқламаяпти — буни сиз ҳам, мен ҳам билмаймиз, Аллоҳдан бошқа ҳеч ким билмайди. Шунинг учун, ёзишдан аввал камида 10 марта ўйлаб кўринг!».
Мазкур муҳокамада аксарият мухлислар Муниса Ризаевани қўллаб-қувватлаган. Хусусан, муҳокамага сабаб бўлган фойдаланувчига Муниса Ризаеванинг Instagram’даги бошқа постларига ҳам эътибор қаратиш тавсия қилинган, хонанда аввалги хабарларида ҳам мухлисларнинг мурожаатларига жавоб қайтаргани эслатиб ўтилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)