Yakuniga yetgan mavsumning ikkinchi davrasida “Buxoro” safiga kelib qo‘shilgan va 11 ta o‘yinda 8 ta gol urgan moldovalik futbolchi Vadim Chemirtan ijtimoiy tarmoqdagi sahifasi orqali buxorolik futbol muxlislariga murojaat qildi, deb yozdi “Championat.asia” nashri.
Vadim Chemirtan Toshkentning “Bunyodkor” klubi safida mashg‘ulot o‘tkazayotgani aytilgan bo‘lib, u katta ehtimol bilan yangi mavsumni avvalgi legionerlaridan hafsalasi pir bo‘lgan “Bunyodkor” safida boshlaydi.
Bu hol “Buxoro” futbol klubi muxlislarining noroziligiga sabab bo‘lib, ular ijtimoiy tarmoq orqali futbolchiga murojaat bilan chiqa boshlagandi.
“Aslida men bu yerda muxlislar bilan gaplashmayman. Ammo buxorolik muxlislarni yaxshi ko‘rganim uchun, bu safar istisno qilaman”, — deb yozdi Vadim Chemirtan.
“Boshqa klubga o‘tishimning asosiy sababi — Osiyo Chempionlar Ligasida o‘ynash istagidir. Sizlarga katta rahmat aytaman. Meni to‘g‘ri tushuninglar, mening ham oilam, bolalarim bor. Ularning qornini to‘ydirishim kerak. ‘Buxoro’ga esa yangi mavsumda sovrinli o‘rinlardan birini band etishini tilab qolaman”.
So‘zining yakunida Vadim Chemirtan buxorolik futbol muxlislarini kirib kelayotgan yangi yil bilan tabrikladi, barchaga omad tiladi.
Ma’lumot uchun, Vadim Chemirtan Chempionlar Ligasi sabab o‘tayotgan “Bunyodkor” klubi musobaqaning pley-offi doirasida bitta o‘yin o‘tkazadi. Bellashuv Sardor Rashidov harakat qiladigan va Qatar Yulduzlar Ligasida peshqadam bo‘lib turgan, qo‘shimchasiga Osiyo Chempionlar Ligasining so‘nggi mavsumida yarim finalga qadar yetib borgan “Al-Jaish”ga qarshi bo‘lib o‘tadi.
Pley-offdagi mag‘lubiyat “Bunyodkor”ni xalqaro maydondan qoldirib yuboradi. Qayd etish kerak, Sergey Lushchan boshqaruvida Toshkent klubi turnirning guruh bosqichini muvaffaqiyatli bosib o‘ta olmagan. “Qaldirg‘ochlar” Osiyo Chempionlar Ligasining guruh bosqichida uzluksiz ishtirok etayotgani inobatga olinsa, jamoa 7-fevral kungi o‘yini bilan bu an’anaga chek qo‘yishi ham mumkin.
Izoh (0)