Якунига етган мавсумнинг иккинчи даврасида «Бухоро» сафига келиб қўшилган ва 11 та ўйинда 8 та гол урган молдовалик футболчи Вадим Чемиртан ижтимоий тармоқдаги саҳифаси орқали бухоролик футбол мухлисларига мурожаат қилди, деб ёзди «Championat.asia» нашри.
Вадим Чемиртан Тошкентнинг «Бунёдкор» клуби сафида машғулот ўтказаётгани айтилган бўлиб, у катта эҳтимол билан янги мавсумни аввалги легионерларидан ҳафсаласи пир бўлган «Бунёдкор» сафида бошлайди.
Бу ҳол «Бухоро» футбол клуби мухлисларининг норозилигига сабаб бўлиб, улар ижтимоий тармоқ орқали футболчига мурожаат билан чиқа бошлаганди.
«Аслида мен бу ерда мухлислар билан гаплашмайман. Аммо бухоролик мухлисларни яхши кўрганим учун, бу сафар истисно қиламан», — деб ёзди Вадим Чемиртан.
«Бошқа клубга ўтишимнинг асосий сабаби — Осиё Чемпионлар Лигасида ўйнаш истагидир. Сизларга катта раҳмат айтаман. Мени тўғри тушунинглар, менинг ҳам оилам, болаларим бор. Уларнинг қорнини тўйдиришим керак. ‘Бухоро’га эса янги мавсумда совринли ўринлардан бирини банд этишини тилаб қоламан».
Сўзининг якунида Вадим Чемиртан бухоролик футбол мухлисларини кириб келаётган янги йил билан табриклади, барчага омад тилади.
Маълумот учун, Вадим Чемиртан Чемпионлар Лигаси сабаб ўтаётган «Бунёдкор» клуби мусобақанинг плей-оффи доирасида битта ўйин ўтказади. Беллашув Сардор Рашидов ҳаракат қиладиган ва Қатар Юлдузлар Лигасида пешқадам бўлиб турган, қўшимчасига Осиё Чемпионлар Лигасининг сўнгги мавсумида ярим финалга қадар етиб борган «Ал-Жаиш»га қарши бўлиб ўтади.
Плей-оффдаги мағлубият «Бунёдкор»ни халқаро майдондан қолдириб юборади. Қайд этиш керак, Сергей Лушчан бошқарувида Тошкент клуби турнирнинг гуруҳ босқичини муваффақиятли босиб ўта олмаган. «Қалдирғочлар» Осиё Чемпионлар Лигасининг гуруҳ босқичида узлуксиз иштирок этаётгани инобатга олинса, жамоа 7 февраль кунги ўйини билан бу анъанага чек қўйиши ҳам мумкин.
Изоҳ (0)