“Lokomotiv” futbol klubi Osiyo Chempionlar Ligasining guruh bosqichidan chiqishiga ishonadi

Toshkentning “Lokomotiv” futbol klubi 13-dekabr kuni tashlangan qur’aga ko‘ra Osiyo Chempionlar Ligasining 2017-yilgi mavsumida “A” guruhidan joy oldi.

Qur’a marosimidan keyin “Lokomotiv” klubining 1 nafardan himoyachi, yarim himoyachi va hujumchisi, shuningdek, bosh murabbiy bo‘lajak raqiblar haqida fikr bildirdi, deb yozdi jamoa matbuot xizmati.

Temurxo‘ja Abduxoliqov

“Qur’ani kuzatib bordim. Oddiy raqiblar duch kelmadi. Bu turnirga jamoalar shunchaki chiqib qolmaydi. Biz bu safar yanada uzoqroqqa borishni ko‘zlayapmiz. Natijalar yaxshilansagina jamoada o‘sish bo‘ladi”.

Bobur Yo‘ldoshev

“2016-yil Chempionlar Ligasidan katta tajriba oldik. Ularni kelasi mavsumda yanada yaxshiroq ko‘rinishda qo‘llashga harakat qilamiz. Ko‘rdikki, har qanday raqib bilan o‘ynasa va yutsa bo‘ladi”.

Server Jeparov

“Bizga u qadar kuchli klublar raqib bo‘lmadi. O‘ynasa va yutsa bo‘ladigan jamoalar bilan duch keldik. Guruhdan chiqishimizga ko‘zim yetyapti. 2017-yil yarim finalga yetib borishni ko‘zlayapmiz. Bu tarkib bilan vazifani uddalash mumkin”.

Andrey Miklyayev

“Guruh biz kutgandek bo‘ldi. Qur’adan ko‘nglim to‘ldi. Faqatgina ‘Al-Ahli’ boshqalardan kuchliroq ko‘rinmoqda. Qolgan jamoalardagi ahvolni guruh bosqichi start olguniga qadar o‘rganib chiqamiz. Biz raqiblardan qo‘rqmaymiz, ular bizdan qo‘rqaversin!”

“Lokomotiv” Osiyo Chempionlar Ligasidagi eng yaxshi natijasiga 2016-yilgi mavsumda erishib, ilk bor guruh bosqichini muvaffaqiyatli bosib o‘tdi va chorak finalga qadar yetib bordi.

O‘zbekiston klublarining Osiyo Chempionlar Ligasidagi eng yaxshi natijasi yarim final bo‘lib, “Paxtakor” 2003, “Bunyodkor” esa 2008 va 2012-yilgi mavsumlarda final ostonasiga qadar yetib borgan.