«Локомотив» футбол клуби Осиё Чемпионлар Лигасининг гуруҳ босқичидан чиқишига ишонади

Тошкентнинг «Локомотив» футбол клуби 13 декабрь куни ташланган қуръага кўра Осиё Чемпионлар Лигасининг 2017 йилги мавсумида «А» гуруҳидан жой олди.

Қуръа маросимидан кейин «Локомотив» клубининг 1 нафардан ҳимоячи, ярим ҳимоячи ва ҳужумчиси, шунингдек, бош мураббий бўлажак рақиблар ҳақида фикр билдирди, деб ёзди жамоа матбуот хизмати.

Темурхўжа Абдухолиқов

«Қуръани кузатиб бордим. Оддий рақиблар дуч келмади. Бу турнирга жамоалар шунчаки чиқиб қолмайди. Биз бу сафар янада узоқроққа боришни кўзлаяпмиз. Натижалар яхшилансагина жамоада ўсиш бўлади».

Бобур Йўлдошев

«2016 йил Чемпионлар Лигасидан катта тажриба олдик. Уларни келаси мавсумда янада яхшироқ кўринишда қўллашга ҳаракат қиламиз. Кўрдикки, ҳар қандай рақиб билан ўйнаса ва ютса бўлади».

Сервер Жепаров

«Бизга у қадар кучли клублар рақиб бўлмади. Ўйнаса ва юца бўладиган жамоалар билан дуч келдик. Гуруҳдан чиқишимизга кўзим етяпти. 2017 йил ярим финалга етиб боришни кўзлаяпмиз. Бу таркиб билан вазифани уддалаш мумкин».

Андрей Микляев

«Гуруҳ биз кутгандек бўлди. Қуръадан кўнглим тўлди. Фақатгина ‘Ал-Аҳли’ бошқалардан кучлироқ кўринмоқда. Қолган жамоалардаги аҳволни гуруҳ босқичи старт олгунига қадар ўрганиб чиқамиз. Биз рақиблардан қўрқмаймиз, улар биздан қўрқаверсин!»

«Локомотив» Осиё Чемпионлар Лигасидаги энг яхши натижасига 2016 йилги мавсумда эришиб, илк бор гуруҳ босқичини муваффақиятли босиб ўтди ва чорак финалга қадар етиб борди.

Ўзбекистон клубларининг Осиё Чемпионлар Лигасидаги энг яхши натижаси ярим финал бўлиб, «Пахтакор» 2003, «Бунёдкор» эса 2008 ва 2012 йилги мавсумларда финал остонасига қадар етиб борган.