Avstriya prezidentligiga qayta saylovlar bo‘lib o‘tmoqda

4-dekabr, yakshanba kuni Avstriya prezidentligiga qayta saylovlar bo‘lib o‘tmoqda. Bu haqda “Interfaks” xabar berdi.

Qayta ovoz berish Avstriya Konstitutsiyaviy sudi shu yil iyul oyida ko‘plab qonun buzilishlari tufayli saylovlarning ikkinchi bosqichi yakunlarini bekor qilganidan so‘ng bo‘lib o‘tmoqda. Keyinchalik parlament qayta ovoz berish o‘tkazilishini ma’qulladi.

Avstriyada prezidentlik saylovlarining ikkinchi bosqichi 22-mayda bo‘lib o‘tgandi. Uning yakunlari bo‘yicha “Yashilllar” partiyasining sobiq yetakchisi Aleksander van der Belen saylovchilarning 50,3, Avstriya ozodlik partiyasi nomzodi Norbert Xofer esa 49,7 foiz ovoz to‘plagandi. Keyinchalik mazkur partiya saylov natijalari yuzasidan norozilik bildirdi. Jumladan, sirtdan ovoz berishning tashkil etilishi jarayoni partiya vakillari shikoyatiga sabab bo‘ldi.

OAV yakshanba kungi ovoz berish natijalariga ko‘ra ikki nomzod o‘rtasidagi farq minimal darajada saqlanib qolishini taxmin qilmoqda. Biroq ayrim tahlilchilar qochoqlar masalasida keskin choralar tarafdori bo‘lgan Xoferning qo‘li bu gal baland keladi, deb hisoblamoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.