“Hizbulloh” partiyasi fotomuxbiri Aleppoda halok bo‘ldi

Livanning “Hizbulloh” partiyasi fotomuxbiri Hasan Sharif Jazza Aleppoda halok bo‘ldi. Bu haqda “TASS” xabar bermoqda.

SANA agentligiga ko‘ra, fotomuxbir shahar janubi-sharqidagi Shayx Said manzilida hukumat kuchlari jangchilarining harbiy operatsiyasidan lavhalar tasvirga tushirayotganda o‘limga olib kelgan jarohat oldi. Mazkur hududda qo‘shinlar va ko‘ngillilarning qurolli guruhlar bilan ashaddiy to‘qnashuvlari bo‘lib o‘tmoqda.

Hasan Sharif Jazza Alepponi jangarilardan ozod qilish bo‘yicha operatsiya boshlanganidan beri frontning oldingi chizig‘idan fotoreportajlar turkumini tayyorlagandi. U vakillari Suriya armiyasi tomonida jang qilayotgan “Hizbulloh” partiyasi operativ shtabi ixtiyorida bo‘lgan.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.