Австрия президентлигига қайта сайловлар бўлиб ўтмоқда

4 декабрь, якшанба куни Австрия президентлигига қайта сайловлар бўлиб ўтмоқда. Бу ҳақда «Интерфакс» хабар берди.

Қайта овоз бериш Австрия Конституциявий суди шу йил июль ойида кўплаб қонун бузилишлари туфайли сайловларнинг иккинчи босқичи якунларини бекор қилганидан сўнг бўлиб ўтмоқда. Кейинчалик парламент қайта овоз бериш ўтказилишини маъқуллади.

Австрияда президентлик сайловларининг иккинчи босқичи 22 майда бўлиб ўтганди. Унинг якунлари бўйича «Яшилллар» партиясининг собиқ етакчиси Александер ван дер Белен сайловчиларнинг 50,3, Австрия озодлик партияси номзоди Норберт Хофер эса 49,7 фоиз овоз тўплаганди. Кейинчалик мазкур партия сайлов натижалари юзасидан норозилик билдирди. Жумладан, сиртдан овоз беришнинг ташкил этилиши жараёни партия вакиллари шикоятига сабаб бўлди.

ОАВ якшанба кунги овоз бериш натижаларига кўра икки номзод ўртасидаги фарқ минимал даражада сақланиб қолишини тахмин қилмоқда. Бироқ айрим таҳлилчилар қочоқлар масаласида кескин чоралар тарафдори бўлган Хофернинг қўли бу гал баланд келади, деб ҳисобламоқда.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.