Badiiy gimnastika bo‘yicha olimpiya chempioni, “Natsionalnaya media gruppa” direktorlar kengashi raisi, Davlat dumasi sobiq deputati Alina Kabayeva mablag‘larini Rus pravoslav cherkovining “Peresvet” bankida saqlagan. Bu haqda Forbes o‘z manbalariga tayanib xabar bermoqda. Nashr ta’kidlashicha, ushbu axborot rasman tasdiqlanmagan, Kabayeva bilan esa jurnalistlar bog‘lana olmagan.
Forbes yozishicha, “Peresvet”da rossiyalik boshqa olimpiyadachilar: og‘ir vaznli bokschi Aleksandr Povetkin va voleybolchi Yekaterina Gamova ham o‘z omonatlarini saqlagan. Shuningdek, 2000, 2004 va 2008-yilgi Olimpiadaning bir qator sovrindorlari ham “Peresvet” mijozlari bo‘lgan.
Povetkinning vakili Forbes’ning bokschi pullarini “Peresvet”da saqlagan-saqlamagani to‘g‘risidagi so‘rovini tasdiqlamadi ham, rad etmadi ham. Gamova esa ushbu bank xizmatlaridan hech qachon foydalanmaganini aytdi.
Oktabr boshida “Peresvet” banki real aktivlarga ega bo‘lmagan sho‘ba korxonalariga shubhali kreditlar bergani fosh qilindi. 21-oktabr kuni Markaziy bank bankda muvaqqat ma’muriyat o‘rnatdi.
Izoh (0)