2015-yilda o‘ng oyog‘idan ajralgan Tallin (Estoniya) meri Edgar Savisaarga Finlyandiyada bionik protez tayyorlandi. Bu haqda “Interfaks” xabar bermoqda.

“Xelsinkida yangi oyog‘im bilan ilk qadamlarni qo‘ydim. Meni MTU Jalg Alla orqali qo‘llab-quvvatlagan kishilarga minnatdorchilik bildiraman, yana bir orzuyim amalga oshdi. Uch oy ichida mo‘jiza ro‘y berdi. Barchangizga rahmat!” — deb yozgan Savisaar Facebook’dagi sahifasida.

Merga xayriya yig‘ish uchun MTU Jalg Alla notijorat birlashmasi tuzilgan va uning hisob raqamiga 23 ming yevro kelib tushgandi. O‘tgan yil bahorida Savisaarning o‘ng oyog‘ida qorason boshlandi va shifokorlar tizzasining yuqorisidan oyog‘ini kesib tashladi. U oxirgi paytda faqat nogironlik aravachasida harakatlanayotgandi.

Savisaar ayni vaqtda korrupsiyada gumon qilinib, mer lavozimidan tergov davrida chetlatilgan. Uning o‘zi aybini tan olmadi va ayblovlar siyosiy tusga ega ekanligini bildirdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.