Бадиий гимнастика бўйича олимпия чемпиони, «Националная медиа группа» директорлар кенгаши раиси, Давлат думаси собиқ депутати Алина Кабаева маблағларини Рус православ черковининг «Пересвет» банкида сақлаган. Бу ҳақда Forbes ўз манбаларига таяниб хабар бермоқда. Нашр таъкидлашича, ушбу ахборот расман тасдиқланмаган, Кабаева билан эса журналистлар боғлана олмаган.
Forbes ёзишича, «Пересвет»да россиялик бошқа олимпиядачилар: оғир вазнли боксчи Александр Поветкин ва волейболчи Екатерина Гамова ҳам ўз омонатларини сақлаган. Шунингдек, 2000, 2004 ва 2008 йилги Олимпиаданинг бир қатор совриндорлари ҳам «Пересвет» мижозлари бўлган.
Поветкиннинг вакили Forbes’нинг боксчи пулларини «Пересвет»да сақлаган-сақламагани тўғрисидаги сўровини тасдиқламади ҳам, рад этмади ҳам. Гамова эса ушбу банк хизматларидан ҳеч қачон фойдаланмаганини айтди.
Октябрь бошида «Пересвет» банки реал активларга эга бўлмаган шўъба корхоналарига шубҳали кредитлар бергани фош қилинди. 21 октябрь куни Марказий банк банкда муваққат маъмурият ўрнатди.
Изоҳ (0)