Ispaniyaning “Barselona” jamoasi rahbariyati argentinalik hujumchi Lionel Messi bilan shartnomani uzaytirish borasida ish olib borishda davom etmoqda, deya ma’lum qildi “Chempionat”.
Ta’kidlanishicha, Argentina terma jamoasi sardori otasi bilan birgalikda “Real”ga qarshi navbatdagi “El-Klasiko”dan so‘ng 2018-yilning yoziga qadar amal qiluvchi kelishuvini uzaytirish bo‘yicha katloniyaliklar bilan muzokara o‘tkazishni rejalashtirmoqda.
“Barselona” bonuslarsiz Messiga yiliga 24 million yevrodan oshadigan maosh taklif qilmoqchi. Ayni damda uning maoshi turli bonuslar bilan 29 million yevroni tashkil etmoqda.
Qayd etish joiz,ilgariroq matbuotda argentinalik futbolchi “Barselona” bilan kelishuv muddatini uzaytirmaslikka qaror qilgani haqida xabar tarqaldi. Goal’ning Messiga yaqin bo‘lgan manbasi bu haqiqat emasligini bildirdi. Keyinroq Messi Yangi yil bayramidan so‘ng kataloniyaliklar bilan shartnomasini uzaytirish borasida muzokara o‘tkazishi ma’lum qilingandi.
Bir muddat avval esa Lionel Messi futbolchilik faoliyatini o‘zining birinchi klubi – Argentinaning “Nyuellz Old Boyz” klubida yakunlamoqchi ekani hamda kataloniyaliklar bilan yangi shartnoma imzolansa, u yerga ketish imkonini beruvchi bandning kiritilishini istayotgani haqida xabar berilgandi.Ma’lumot uchun, Ispaniya chempionati 14-turidan o‘rin olgan “Barselona” va “Real” o‘rtasidagi “El-Klasiko” 3-dekabr kuni “Kamp Nou” stadionida bo‘lib o‘tadi. Uchrashuv Toshkent vaqti bilan soat 20:15 da boshlanishi rejalashtirilgan.Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)