O‘zbekiston Prezidenti sayloviga taklif etilgan xalqaro kuzatuvchilar o‘z ishlariga kirishib, diplomatik vakolatxonalarda ochilgan saylov uchastkalariga bormoqda, saylovlarga tayyorgarlik va ularni o‘tkazish jarayoni bilan qiziqmoqda. Ulardan ayrimlari “Jahon” axborot agentligi bilan taassurot va mulohazalarini o‘rtoqlashdi.
— O‘zbekistonga ko‘p bor kelish va mamlakat erishgan ulkan yutuqlarga guvoh bo‘lish imkoniyatiga ega bo‘lganman. Bugungi kunda Birinchi Prezident Islom Karimovning O‘zbekiston kelajagi buyuk davlat ekanligi haqidagi so‘zlari haqiqatga aylanmoqda.
Bo‘lajak saylovlar davomida O‘zbekiston xalqi mamlakat ijtimoiy-iqtisodiy hayotidagi o‘zgarishlarni davom ettirishga qodir munosib yetakchini saylashiga ishonaman, — deydi AQShda chop etiladigan The Bukharian Times gazetasi asoschisi va bosh muharriri Rafael Nektal.
— O‘z faoliyati doirasida jamiyatimiz vakillari O‘zbekiston hamda xorijdagi turli tadbirlarda doimiy ishtirok etadi, — deya ta’kidladi “Germaniya—O‘zbekiston” do‘stlik jamiyati vitse-prezidenti Diyeter Brandenburger. — Oxirgi bor 2014-yilda mamlakatda bo‘lib o‘tgan parlament saylovlaridagi qatnashganim, ularga tayyorgarlikning borishi va o‘tkazilishini shaxsan kuzatganimdan kelib chiqib, O‘zbekiston prezidentlik saylovini yuqori darajada tashkil etishini ishonch bilan ayta olaman.
Xalqaro kuzatuvchi sifatida saylovlarda ishtirok etishga taklif etilganim men uchun katta sharaf va do‘st o‘zbek xalqining kelajagi uchun ulkan mas’uliyat yuklaydi. Kuzatishlar yakuni bo‘yicha albatta 4-dekabrdagi prezidentlik sayloviga tayyorgarlik va uning o‘tkazilishiga oid hisobot tayyorlanadi.
Izoh (0)