Ўзбекистон Президенти сайловига таклиф этилган халқаро кузатувчилар ўз ишларига киришиб, дипломатик ваколатхоналарда очилган сайлов участкаларига бормоқда, сайловларга тайёргарлик ва уларни ўтказиш жараёни билан қизиқмоқда. Улардан айримлари «Жаҳон» ахборот агентлиги билан таассурот ва мулоҳазаларини ўртоқлашди.
— Ўзбекистонга кўп бор келиш ва мамлакат эришган улкан ютуқларга гувоҳ бўлиш имкониятига эга бўлганман. Бугунги кунда Биринчи Президент Ислом Каримовнинг Ўзбекистон келажаги буюк давлат эканлиги ҳақидаги сўзлари ҳақиқатга айланмоқда.
Бўлажак сайловлар давомида Ўзбекистон халқи мамлакат ижтимоий-иқтисодий ҳаётидаги ўзгаришларни давом эттиришга қодир муносиб етакчини сайлашига ишонаман, — дейди АҚШда чоп этиладиган The Bukharian Times газетаси асосчиси ва бош муҳаррири Рафаэль Нектал.
— Ўз фаолияти доирасида жамиятимиз вакиллари Ўзбекистон ҳамда хориждаги турли тадбирларда доимий иштирок этади, — дея таъкидлади «Германия—Ўзбекистон» дўстлик жамияти вице-президенти Диетер Бранденбургер. — Охирги бор 2014 йилда мамлакатда бўлиб ўтган парламент сайловларидаги қатнашганим, уларга тайёргарликнинг бориши ва ўтказилишини шахсан кузатганимдан келиб чиқиб, Ўзбекистон президентлик сайловини юқори даражада ташкил этишини ишонч билан айта оламан.
Халқаро кузатувчи сифатида сайловларда иштирок этишга таклиф этилганим мен учун катта шараф ва дўст ўзбек халқининг келажаги учун улкан масъулият юклайди. Кузатишлар якуни бўйича албатта 4 декабрдаги президентлик сайловига тайёргарлик ва унинг ўтказилишига оид ҳисобот тайёрланади.
Изоҳ (0)