AQSh Kongressi Hillari Klinton Davlat kotibi lavozimini egallagan chog‘da xizmat yozishmalari uchun shaxsiy kompyuteridan foydalangani bilan bog‘liq ishni tekshirishda davom etadi. Bu haqda vakillar palatasi nazorat va hukumat islohotlari qo‘mitasi raisi Jeyson Chaffets ma’lum qildi, deya xabar beradi “TASS”.
“Klintonning ishi bo‘yicha tekshiruv davom etadi. Saylovlar o‘tdi, deb uni tinch qo‘yadigan bo‘lsam, lavozim bo‘yicha zimmamga yuklatilgan vazifani bajarishdan bo‘yin tovlagan bo‘laman. Ish oxirigacha yetkazilishi va bunday hodisa hech qachon qaytarilmasligi kafolatlanishi kerak”, — deya ta’kidladi Chaffets Fox News telekanaliga bergan intervyusida.
Kongressmenga ko‘ra, shaxsiy elektron pochtasidan xizmat maqsadlarida foydalanish muammosi faqat Klintonning o‘ziga emas, uning atrofidagi o‘nlab kishilarga ham tegishli. Hukumatda hali ham mazkur hodisaga aloqador mansabdorlar ishlashda davom etmoqda.
Eslatib o‘tamiz, oldinroq Hillari Klinton AQSh prezidentligiga saylovlarda mag‘lubiyatga uchrashida Federal qidiruv byurosi (FQB) rahbari Jeyms Komini ayblagani ma’lum qilingandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)