2010-yil noyabrda aviahalokat qurboni bo‘lgan Polsha prezidenti Lex Kachinskiy va rafiqasi Mariyaning jasadlari eksgumatsiya qilinadi (sud-tibbiyot ekspertizasi uchun qabrdan kovlab olinadi). Bu haqda “RIA Novosti” xabar berdi.
Er-xotin Kachinskiylar Krakovning Vavel qasridagi sarkofagga dafn etilgan edi. Eksgumatsiya 14-noyabr, dushanba kuni kechki payt ularning yaqinlari va ruhoniylar ishtirokida bo‘lib o‘tadi. O‘sha kuniyoq jasadlar Yagellon universitetining Collegium Medicum sud tibbiyoti muassasasiga yetkaziladi.
Jasadlarni o‘rganish uchun to‘rt kun vaqt ketishi taxmin qilinmoqda, qayta dafn marosimi esa 18-noyabrga belgilangan.
Polsha bosh prokurori o‘rinbosari Marek Pashchonek avvalroq aviahalokat qurbonlarini eksgumatsiya qilishga tibbiy hujjatlarda aniqlangan xatolik tufayli zarurat tug‘ilganini aytgan edi.
To‘plangan hujjatlarni o‘rganib chiqadigan xalqaro ekspertlar guruhi eksgumatsiyadan so‘ng to‘rt oy davomida hisobot tuzishi kerak.
Bortida Polsha prezidenti Lex Kachinskiy va mamlakat rahbariyati vakillari bo‘lgan Tu-154 samolyoti 2010-yil 10-aprelda Rossiyaning Smolensk aerodromiga qo‘nish chog‘ida qulagan. Sakkiz nafar ekipaj a’zosi va 88 yo‘lovchining barchasi halok bo‘lgan.
Izoh (0)