Janubiy Koreya prezidenti Pak Kin Xe dugonasi Chxve Sun Sil bilan qalin munosabatlari natijasida yo‘l qo‘ygan xatolarini tan oldi va ularni “yurakni tilka-pora qiladigan” deb atadi. Bu haqda “Interfaks” xabar berdi.
Janubiy Koreya televideniyesi orqali mamlakat xalqiga murojaatida u yuzaga kelgan siyosiy mojarodagi roliga nisbatan tekshiruv o‘tkazilishiga tayyor ekanligini ma’lum qildi.
Nashr eslatishicha, uning dugonasi Chxve Sun Sil, ma’muriyatda hech qanday rasmiy lavozimni egallamasdan turib, prezident bilan shaxsiy aloqalaridan foydalangan holda, uning nutqlarini tahrirlagan, shu tariqa siyosatga soyali ta’sir o‘tkazgan. Bundan tashqari, u nohukumat tashkilotlarni moliyalashtirish bilan bog‘liq firibgarliklarga aralashgan.
Eslatib o‘tamiz, avvalroq Seul okrug sudi mamlakat prezidenti Pak Kin Xening dugonasi, yirik korrupsion janjalga aralashib qolgan Chxve Sun Silni hibsga olish uchun ruxsatnoma berdi. Shuningdek, so‘nggi haftada mamlakatni qamrab olgan shov-shuvli mojaroning asosiy ishtirokchilaridan biri hisoblangan prezident sobiq yordamchisi Chjon Xo Son hibsga olindi.
Izoh (0)