O‘zbekiston Respublikasi prezidentligiga O‘zXDPdan ko‘rsatilgan nomzod Hotamjon Ketmonov Andijon viloyati saylovchilari bilan uchrashdi. Uchrashuv Bo‘z tumanida, onlayn video-konferensiya shaklida viloyatning barcha tuman va shaharlaridagi saylovchilarni qamrab olgan holda tashkil etildi. Bu haqda partiya markaziy kengashi matbuot xizmati ma’lum qildi.
Tadbir avvalida nomzodning ishonchli vakili Abdulhamid Nurmatov Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z olgan Hotamjon Ketmonov saylovoldi dasturining asosiy yo‘nalishlari yuzasidan yig‘ilganlarga batafsil ma’lumot berdi.
Xususan, ishchi kuchi chetga chiqib ketishining oldini olish, buning uchun har yili qabul qilinadigan ish o‘rinlari tashkil etish va aholi bandligini ta’minlash Davlat dasturi ijrosida yangicha yondashuvlarga o‘tish, bunda asosiy e’tiborni mehnat bozoridagi talab-taklifni to‘liq o‘rganish va hisobga olish, hududlarni ijtimoiy-iqtisodiy rivojlantirish dasturlarini tuzishda joriy va istiqboldagi rivojlanish yo‘nalishlarini to‘g‘ri va aniq belgilash bo‘yicha takliflarini ilgari surdi.
Shuningdek, ma’ruzada kichik biznes, uy mehnati, kasanachilik va oilaviy tadbirkorlikni yanada rivojlantirish orqali xotin-qizlar bandligini ta’minlash samaradorligini oshirish, mehnat qonunchiligida ayollarga berilgan huquq va qo‘shimcha imtiyozlardan keng foydalanishlari uchun yanada maqbul sharoitlarni yaratish lozimligi ta’kidlandi.
Ma’ruza yuzasidan so‘zga chiqqanlar nomzod dasturida ilgari surilayotgan talabalarning ta’lim shartnomalarini to‘layotgan korxonalar va tashkilotlarni rag‘batlantirish, mutaxassislar tayyorlash yo‘nalishlarini belgilashda korxona va tashkilotlarning kadrlarga bo‘lgan joriy hamda istiqboldagi ehtiyojlarini hisobga olish haqidagi fikrlarni qo‘llab-quvvatladi.
Shundan so‘ng savol-javoblarga navbat berildi. Saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob olish imkoniga ega bo‘ldi.
Izoh (0)