Ўзбекистон Республикаси президентлигига ЎзХДПдан кўрсатилган номзод Ҳотамжон Кетмонов Андижон вилояти сайловчилари билан учрашди. Учрашув Бўз туманида, онлайн видео-конференция шаклида вилоятнинг барча туман ва шаҳарларидаги сайловчиларни қамраб олган ҳолда ташкил этилди. Бу ҳақда партия марказий кенгаши матбуот хизмати маълум қилди.
Тадбир аввалида номзоднинг ишончли вакили Абдулҳамид Нурматов Ҳотамжон Кетмоновнинг таржимаи ҳоли билан йиғилганларни таништирди. Шундан сўнг сўз олган Ҳотамжон Кетмонов сайловолди дастурининг асосий йўналишлари юзасидан йиғилганларга батафсил маълумот берди.
Хусусан, ишчи кучи четга чиқиб кетишининг олдини олиш, бунинг учун ҳар йили қабул қилинадиган иш ўринлари ташкил этиш ва аҳоли бандлигини таъминлаш Давлат дастури ижросида янгича ёндашувларга ўтиш, бунда асосий эътиборни меҳнат бозоридаги талаб-таклифни тўлиқ ўрганиш ва ҳисобга олиш, ҳудудларни ижтимоий-иқтисодий ривожлантириш дастурларини тузишда жорий ва истиқболдаги ривожланиш йўналишларини тўғри ва аниқ белгилаш бўйича таклифларини илгари сурди.
Шунингдек, маърузада кичик бизнес, уй меҳнати, касаначилик ва оилавий тадбиркорликни янада ривожлантириш орқали хотин-қизлар бандлигини таъминлаш самарадорлигини ошириш, меҳнат қонунчилигида аёлларга берилган ҳуқуқ ва қўшимча имтиёзлардан кенг фойдаланишлари учун янада мақбул шароитларни яратиш лозимлиги таъкидланди.
Маъруза юзасидан сўзга чиққанлар номзод дастурида илгари сурилаётган талабаларнинг таълим шартномаларини тўлаётган корхоналар ва ташкилотларни рағбатлантириш, мутахассислар тайёрлаш йўналишларини белгилашда корхона ва ташкилотларнинг кадрларга бўлган жорий ҳамда истиқболдаги эҳтиёжларини ҳисобга олиш ҳақидаги фикрларни қўллаб-қувватлади.
Шундан сўнг савол-жавобларга навбат берилди. Сайловчилар ўзларини қизиқтирган саволларга номзод ва унинг ишончли вакилларидан атрофлича жавоб олиш имконига эга бўлди.
Изоҳ (0)