Leningrad hayvonot bog‘ida jahondagi eng keksa jirafalardan birining 35 ga to‘lishi nishonlanadi

Leningrad hayvonot bog‘ida yashovchi Luga laqabli jirafa 31-oktabr kuni 35 yoshga to‘ladi. Bu haqda “Interfaks” xabar bermoqda.

Xabar berishlaricha, jirafalarning hayvonot bog‘idagi umr davomiyligi o‘rtacha 25 yilni tashkil etadi, tabiiy sharoitlarda esa undan ham kamroq. Shu sababli Luganing 35 yoshga to‘lishi — o‘ziga xos voqea.

“Hozirgi vaqtda Lugani jahon hayvonot bog‘larida yashayotgan eng keksa jirafa deb taxmin qilish uchun asoslar bor”, — deydi hayvonot bog‘i matbuot xizmati vakillari.

Butun umr Leningrad hayvonot bog‘ida yashagan Luganing tug‘ilgan kuni 4-noyabr kuni nishonlanishi kutilmoqda.

Luga 1981-yilda, Malchik va Neva laqabli jirafalar juftligidan dunyoga kelgan. Hozirgi vaqtda u Leningrad hayvonot bog‘ida Sonya laqabli qizi bilan birga hayot kechirmoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.