Alisher Navoiy nomidagi O‘zbekiston Milliy kutubxonasida INFOLIB—2016 milliy axborot-kutubxona haftaligi boshlandi. Bu haqda O‘zA xabar bermoqda.
Haftalik Alisher Navoiy nomidagi Milliy kutubxona, O‘zbekiston Axborot texnologiyalari va kommunikatsiyalarini rivojlantirish, Oliy va o‘rta maxsus ta’lim, Xalq ta’limi, Madaniyat va sport ishlari, Sog‘liqni saqlash vazirliklari, O‘zbekiston Fanlar akademiyasi, Kasaba uyushmalari federatsiyasi kengashi, Matbuot va axborot agentligi, O‘rta maxsus, kasb-hunar ta’limi markazi hamkorligida tashkil etilgan.
Haftalik davomida “Mustaqillikning 25 yili: mintaqalar rivojlanishi dinamikasi” nomli videomuloqot, “Eng yaxshi axborot-kutubxona muassasasi mutaxassisi — 2016” tanlovi, “Axborot-kutubxona resurslari katalogizatsiyasining dolzarb masalalari” mavzuidagi trening, “O‘zbekiston axborot-kutubxona muassasalarining bibliografik faoliyati: rivojlanish istiqbollari” mavzuidagi o‘quv-seminar, “Zamonaviy axborot texnologiyalari asosida axborot-kutubxona resurslarini saqlash, restavratsiya va konservatsiya qilish, elektron bazasini yaratish” o‘quv-seminari, “Axborot-kutubxona sohasida marketing” nomli trening kabi tadbirlar o‘tkaziladi.
Haftalikning har bir kuni “Ochiq eshiklar”, “Ijod”, “Ko‘rik-tanlovlar”, “Bilimlar va xorijiy tillar”, “Madaniyatlar xilma-xilligi” kuni deb nomlanib, uning doirasida mavzuga oid tadbirlar, uchrashuvlar, anjumanlar o‘tkaziladi.
Milliy kutubxona, Xalq ta’limi vazirligi, YuNESKOning O‘zbekistondagi vakolatxonasi hamkorligidagi “O‘quvchining axborot madaniyati” nomli o‘quv-metodik kompleksi taqdimoti, turli madaniy-ma’rifiy tadbirlar, she’rxonlik, musiqa kechalari, yangi adabiyotlar taqdimoti, yozuvchi va shoirlar, san’atkorlar, sportchilar bilan uchrashuvlar, ma’rifiy filmlar namoyishi bo‘lib o‘tadi.
Xorijiy davlatlarning elchixonalari, Britaniya kengashi, Toshkentdagi Gyote instituti bilan hamkorlikdagi tadbirlarda xorijiy ma’rifiy dasturlar haqida to‘laqonli ma’lumotlar berilsa, milliy hunarmandlik, tasviriy san’at, shaxmat bo‘yicha tashkil etiladigan mahorat saboqlari bolalarning bilimlarini yanada boyitadi.
Haftalik doirasida kutubxona o‘qish zallarida yangi adabiyotlarning ochiq ko‘rgazmasi, nashriyotlar va kitob savdosi tashkilotlarining mahsulotlari yarmarkasi bo‘lib o‘tadi.
Umumta’lim maktablari, kasb-hunar kollejlari va akademik litseylar o‘quvchilari o‘rtasida “Kitob ummoni bo‘ylab sayohat” nomli adabiy savol-javob o‘yini, “Ta’lim sohasidagi huquqingizni bilasizmi?” nomli viktorina, «Jonajon yurtim –mening rasmlarimda”, “O‘zbekiston kelajagi — mening tasavvurimda” deb nomlangan badiiy, adabiy tanlovlar yoshlarning tafakkurini charxlashga xizmat qiladi.
Haftalikning ilk kunida o‘quvchi-yoshlar uchun Milliy kutubxonaga ekskursiya, konsertlar, san’atkorlar bilan uchrashuvlar, axborot-kutubxona muassasalari xodimlari uchun o‘quv-seminarlar, videomuloqotlar, ma’rifiy anjumanlar bo‘lib o‘tdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)