Rossiyaning Novosibirsk shahridagi avtobus yo‘nalishlaridan birining so‘nggi bekatida isitish tizimi bilan ta’minlangan va 40 kishiga mo‘ljallangan, konditsionerli, bepul hojatxonasi bor, haydovchilar uchun oshxona va dushxonasi mavjud dam olish xonasiga ega avtobus bekati foydalanishga topshirildi. Bu haqda TJournal xabar bermoqda.
“Prigorodniy prostor” issiq avtobus bekati shu nomli kichik tuman hududida ochilgan. Tuman PR-menejeri Yekaterina Zeninaning ma’lum qilishicha, bu Tolmachyovo qishlog‘i va Novosibirsk shahri o‘rtasidagi oraliq bekat bo‘ladi, shu maqsadda shaharning 28-avtobusi yo‘nalishi uzaytirilgan.
Uning so‘zlariga ko‘ra, yangi bekat faqat 28-avtobus yo‘lovchilari va haydovchilari uchun mo‘ljallangan, shunga qaramay, unda avvalgidek boshqa yo‘nalish avtobuslari ham to‘xtab o‘tishi mumkin. Boshqa reyslarning yo‘lovchilari bu bekat qulayliklaridan foydalanishi mumkinmi-yo‘qmi, bunga aniqlik kiritilmagan.
Novosibirsk shahri ma’muriyatining ma’lum qilishicha, qulay bekat qurilgani va avtobus yo‘nalishining uzaytirilgani bilan, yo‘l haqi o‘zgarmagan. Bekat “Novosibirsk shahri aholisi uchun transport xizmatini yaxshilash maqsadida” qurilgan.
Jahondagi eng qulay avtobus bekati qaysi?
Bu savolga aniq javob berish qiyin. Google’ga shunday savol bilan murojaat qilinsa, u Buyuk Britaniyaning Anst orolida joylashgan bekatni ko‘rsatadi.
Orolda yagona hisoblangan bu bekat divan, televizor va jurnallar bilan ta’minlangan. Aslida esa bu bekatga umuman zarurat yo‘q — orol bo‘ylab harakatlanuvchi yagona avtobus yo‘lovchilarni yo‘l-yo‘lakay yig‘ib ketaveradi.
Konditsionerli, salqin ichimliklar va jurnallar bilan to‘ldirilgan qulay bekatlar 2006-yili Dubayda ham ochilgan edi.
2015-yili esa Rossiya tarkibidagi Komi Respublikasining Kortkeros shahrida mahalliy ma’muriyat “ko‘rinmas bekat”ni tantanali ravishda foydalanishga topshirgan edi. Bekat yerga yotqizilgan ikki beton plitadan iborat edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)