Black Eyed Peas guruhi a’zolari Will.i.am va Apl.de.ap xonanda Liane V bilan hamkorlikda AQSh prezidentligiga nomzod Donald Trampga qarshi “GRAB'm by the P*$$Y” nomli targ‘ibot klipini chiqardi. Bu haqda TJournal xabar bermoqda.
Klipda prezidentlik debatlari mavzulari atrofida bahs olib boriladi. Tramp siymosida chiqish qilgan Black Eyed Peas a’zosi Will.i.am Hillari Klinton rolini o‘ynagan Liane V’ga qarshi kurashadi. Respublikachilardan nomzod jurnalistning AQSh iqtisodiyoti va Suriyadagi inqiroz haqidagi savollariga javob bera olmaydi.
Klip so‘ngida Will.i.am tomoshabinlarga Donald Trampga ovoz bermaslik iltimosi bilan murojaat qiladi.
“Agar bu teleshou bo‘lganida edi, ehtimol, men uni tomosha qilgan bo‘lardim — bu haqiqatan ham qiziq. Agar bu kino bo‘lganida edi, uni tomosha qilish men pul ham sarflagan bo‘lardim. Biroq bu sirk yoki shou emas — bu haqiqiy muammolarga to‘la haqiqiy hayot”, — dedi Will.i.am.
Qo‘shiqning nomi Tramp 2005-yili aytgan iqtibosga ishora qiladi.
The Washington Post gazetasi ixtiyorida paydo bo‘lgan va shundan so‘ng keng tarqalib ketgan videoda Tramp teleboshlovchi Billi Bushga noma’qul so‘zlarni qo‘llagan holda qanday qilib eri bor bir ayolning boshini aylantirmoqchi bo‘lgani, biroq bu urinishi omadsiz tugagani haqida so‘zlab bergan.
Izoh (0)