Россиянинг Новосибирск шаҳридаги автобус йўналишларидан бирининг сўнгги бекатида иситиш тизими билан таъминланган ва 40 кишига мўлжалланган, кондиционерли, бепул ҳожатхонаси бор, ҳайдовчилар учун ошхона ва душхонаси мавжуд дам олиш хонасига эга автобус бекати фойдаланишга топширилди. Бу ҳақда TJournal хабар бермоқда.
«Пригородний простор» иссиқ автобус бекати шу номли кичик туман ҳудудида очилган. Туман PR-менежери Екатерина Зенинанинг маълум қилишича, бу Толмачёво қишлоғи ва Новосибирск шаҳри ўртасидаги оралиқ бекат бўлади, шу мақсадда шаҳарнинг 28-автобуси йўналиши узайтирилган.
Унинг сўзларига кўра, янги бекат фақат 28-автобус йўловчилари ва ҳайдовчилари учун мўлжалланган, шунга қарамай, унда аввалгидек бошқа йўналиш автобуслари ҳам тўхтаб ўтиши мумкин. Бошқа рейсларнинг йўловчилари бу бекат қулайликларидан фойдаланиши мумкинми-йўқми, бунга аниқлик киритилмаган.
Новосибирск шаҳри маъмуриятининг маълум қилишича, қулай бекат қурилгани ва автобус йўналишининг узайтирилгани билан, йўл ҳақи ўзгармаган. Бекат «Новосибирск шаҳри аҳолиси учун транспорт хизматини яхшилаш мақсадида» қурилган.
Жаҳондаги энг қулай автобус бекати қайси?
Бу саволга аниқ жавоб бериш қийин. Google’га шундай савол билан мурожаат қилинса, у Буюк Британиянинг Анст оролида жойлашган бекатни кўрсатади.
Оролда ягона ҳисобланган бу бекат диван, телевизор ва журналлар билан таъминланган. Аслида эса бу бекатга умуман зарурат йўқ — орол бўйлаб ҳаракатланувчи ягона автобус йўловчиларни йўл-йўлакай йиғиб кетаверади.
Кондиционерли, салқин ичимликлар ва журналлар билан тўлдирилган қулай бекатлар 2006 йили Дубайда ҳам очилган эди.
2015 йили эса Россия таркибидаги Коми Республикасининг Корткерос шаҳрида маҳаллий маъмурият «кўринмас бекат»ни тантанали равишда фойдаланишга топширган эди. Бекат ерга ётқизилган икки бетон плитадан иборат эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)