Ҳиллари Клинтон номидан 134 белгили битта твитни ўйлаб топиш учун 11 киши керак

Хакерлар Ҳиллари Клинтон сайлов штаби бошлиғининг почтасини бузиб кирди. Жон Подестанинг ёзишмалари 7 октябрдан бери WikiLeaks сайтида эълон қилиб борилмоқда. Подестанинг фикрича, унинг почтасини рус хакерлари бузиб кирган. Ёзишмаларни кузатиб, Клинтоннинг твитлари устида бутун бошли жамоа иш олиб боришини пайқаш мумкин. Хусусан, Пуэрто-Рикода юз берган инқироз ҳақидаги 134 белгидан иборат хабарни бир вақтнинг ўзида 11 киши муҳокама қилган.

Биринчи хабарни Ҳиллари Клинтоннинг маслаҳатчиси Энн О’Лири ёзган: «Ҳиллари Клинтон Пуэрто-Рикодаги қарз инқирози ҳақида твит ёзмоқчи. Мақсад — твит пуэрториколикларга ҳамдардлик руҳида бўлиши керак. Биз улар билан бирга эканимиз, уларнинг саломатлиги ва фаровонлиги бизни ҳам ўйлантириши англашилиши керак».

У шундай твит ёзишни таклиф қилган: «Пуэрто-Рикодаги қарз инқирози — фақат уларнинг муаммоси эмас. Биз мамлакат иқтисодиётини барқарорлаштириш, унинг ўсишига таъсир кўрсатиш ва одамларнинг яхши яшашига ёрдам бериш учун ҳамкор бўлишимиз керак».

Бу твит нафақат ўзбек тилида, балки инглиз тилида ҳам Twitter’даги 140 белгилик чекловга сиғмасди, бу ҳақда Энн О’Лирининг ўзи ҳам хатида қайд этиб ўтган. Хатнинг нусхасини у бошқа тўққиз маслаҳатчига, хусусан, Ҳиллари Клинтоннинг сайлов штаби бошлиғи Жон Подестага ҳам юборган.

Аманда Рентерия шундай жавоб беради: унинг фикрича, твитда «‘асосий муаммолар’ ҳиссиёти» етишмаяпти. Штаб ходимларидан бири Робби Мук эса твит мазмунини Пуэрто-Рикодаги иттифоқчилар билан маслаҳатлашишни таклиф қилган. «Ҳа, мен айнан шу масала устида ишлаяпман. Бир соатдан бери телефондаман», — дея жавоб берган Рентерия.

Жон Подеста ҳам ўз таклифини билдирган: «Бундай десак-чи: ‘Пуэрто-Рикодаги қарз инқирози барча америкаликларга дахл қилади. Биз...».

Бир неча соатлик муҳокамалардан сўнг твит тайёр бўлган. У шахсан Ҳиллари Клинтоннинг имзоси билан чиққан. Твитда 134 белги бор (имзони ҳисобга олмаганда).

https://twitter.com/HillaryClinton/status/616051441900367874

Meduza’нинг ёзишича, 2012 йилги президент сайлови кампанияси вақтида республикачилардан номзод Митт Ромнининг твитлари ва ижтимоий тармоқлардаги бошқа чиқишларини бир вақтнинг ўзида 22 нафаргача одам муҳокама қилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.