Hindiston rasmiylari teraktlar xavfi tufayli Tojmahal maqbarasida xavfsizlik choralari kuchaytirilishini e’lon qildi. Bu haqda “TASS” xabar bermoqda.
Business Standard nashriga ko‘ra, sayyohlik markazi tartibni qo‘riqlovchi odatiy politsiya qismlaridan tashqari maqbara ichi va atrofidagi marralarni egallaydigan 36 nafar harbiydan iborat maxsus bo‘linma bilan kuchaytiriladi. Shuningdek, politsiyachilar terrorchilik hujumi ehtimoli yuzasidan maxsus yo‘riqnomalar oladi.
Mamlakat ichki ishlar vazirligi Lakxnau, Agra, Kanpur, Banoras, Allohobod va boshqa mintaqalardagi qator diniy markazlar, shuningdek, Pokiston bilan chegara yaqinidagi shtatlarda joylashgan 22 aeroport va Dehlida ham xavfsizlikni kuchaytirmoqda.
Oldinroq Hindiston bosh vazirining milliy xavfsizlik bo‘yicha maslahatchisi Ajit Doval 100 ga yaqin ekstremist mamlakat hududida teraktlar uyushtirish uchun Hindiston va Pokiston qo‘shinlarini ajratuvchi Kashmirdagi nazorat chizig‘ini kesib o‘tishga tayyor ekanligini bildirgandi.
Izoh (0)